金融High Tea 2015年9月24日
搵藉口發難
2015年09月24日
全球股市有啲顧得頭來腳反筋的味道。美國聯邦儲備局開完會決定押後加息，當散戶以為可以唞唞氣之際，大戶又話擔心經濟不明朗，借歐洲大眾汽車醜聞同銅價下調，加上財新製造業採購經理指數(PMI)唔靚仔下造淡。
PMI踩多一腳
內地財新9
月PMI初值只得47，較8月終值下降0.3個百分點，連續7個月處於榮枯線下方，且為2009年3月來最低，港股乘機玩大插。香港股民本來觀望一下國家主席習近平訪美有無炒作機會，如果心急追貨現在可能已經中招，如果仲未郁手，咁就比較好彩啦。
隔晚歐股由德國領頭大跌，死因係話大眾汽車涉嫌造假風波擴散，該公司CEO文德恩(Martin Winterkorn)已被解僱，大眾汽車股價繼上日大插近17%後再跌6%，連同國際機構大幅唱淡中國經濟增長前景，令銅鐵等大宗商品價格大跌，歐股整體大插3%，美股承接向下，杜指數市跌180點已經算強韌，結果港股昨日一開市就無運行，最無厘頭係內地汽車股都拖低埋，長城汽車(2333) 大跌逾6%，收市報21.5元，成為表現最差國企指數成份股。內地車市同歐洲相去十萬八千里，而且一家公司的不利消息，本來都可以係對手的好消息，現在有理無理跌一餐，所以話想跌只係需要搵理由。
外資於午後持續流出A股市場，令滬股通全日餘額增至141.43億元人民幣，即淨沽盤11.43億元人民幣。港股午後一度跌得幾可怕，最多插成788點，低見21008點，但兩萬一有買盤低吸，加上歐洲開市回穩，最終港股只跌唔夠500點收市。恒生指數收報21302點，跌493點；國企指數收報9570點，跌265點，成交增至927億元。
內地汽車股沽壓大，但發改委擬推新能源車政策，比亞迪(1211) 拗腰微升0.7%。全球股市突然又仆一碌，只能解釋作議息前個市升咗，見到唔加息好消息兌現就出貨。有中環茶友加把嘴，話內地調查股市作弊持續發酵都影響氣氛。好似外電引述知情人士話，中國官方初步調查顯示，中信證券(6030) 涉嫌存在利用事先獲悉的政府救市措施，作為自身牟利的行為，涉嫌引導救市資金為其牟利或為其輸送利益。現時調查仍在進行中，涉及多名要員。中信證券股價應聲下挫，收挫4.4%，造14.36元；其他證券股亦捱沽。內地股市現時仲係風聲鶴唳，炒起來又點會有氣勢呢？
內地股市現在不止港人關心，甚至變成國際話題。習近平去到西雅圖開腔都講股，話隨着中國政府採取穩定市場措施，遏制股市恐慌情緒，目前股市已進入修復和自我調節階段，又話無意壓低人仔匯價刺激出口，語意對外資應該都比較入耳。問題係7月大跌後，市場唔太跟官府支指揮棒走。
思捷又勁蝕
昨日個市咁跌法，加上臨近月尾，大家自然唔敢對習大大之行抱太大期望，正路係個市探探底，看看上次低位有無支持，如果有支持，有得炒反彈，咁就睇吓有邊個板塊會受惠中美合作，所以雖然個市無得短炒，唔等於領導人訪美之行，日後沒有留意價值。
思捷環球(330) 宣佈最新業績，受銷售疲弱且減值撥備急增影響，截至6月底止年度業績再錄得巨額虧損，勁蝕36.96億元，明顯衰過市場預期，去年同期則賺2.1億元，每股虧損1.9元，不派末期息。
馬化騰減持騰訊套現
管理層話，本年度零售銷售及批發可控制面積將會持續下降，但跌幅較上年度細，且零售及批發的每平方米銷售額將會改善，令毛利率會平穩或輕微上升，希望呢啲唔係管理層主觀願望啦，一家公司做衰咗，想搞番好仲難過開家新公司啦。
市況波動，好多人寧願現金揸手，港交所資料顯示，騰訊(700) 主席馬化騰，在上周四至本周二期間，先後四次減持公司股份，作價每股介乎133.365元至135.495元，共出售二千三百幾萬股，套現逾32億元。馬化騰持有騰訊的股權比率，跌0.25個百分點至9.37%。馬化騰減持騰訊，年內已不是第一次。4月正值港股大時代的起點，馬化騰趁高減持2千萬股，取得近32.2億元現金。騰訊股價昨日跟隨大市向下，收報130.9元，跌1.5元。
陸羽仁
金融High Tea 舊文