一周三件：中外運炒注資
■中外運今年上半年盈利8.8億元人民幣。圖為集團董事長趙滬湘。 資料圖片
中國外運（598）今年4月最高見18.6倍PE，股價到家陣調整近半，預測PE落番單位數，環球行家中平霸，加埋有機會注資，中外運現水位，有啲留口水。
中外運今年上半年盈利增長31%到8.8
億元人仔，已經有半年靚仔成績打底。場內專業評估，中外運今年盈利15.2億元人仔，增長23%，EPS0.4港元，明年EPS再增長10%，到0.44港元，現價（4.08元）預測PE跌到9.3倍。中外運由2003年上市以嚟，平均16.5倍PE，明年預測PE平咗44%。
七成大行叫買
中外運揸咗近61%嘅外運發展（滬：600270），外運發展明年預測16.5倍PE，環球物流行家，UPS明年預測17.5倍PE、FedEx14.2倍、市值過600億港元嘅日本大和控股，明年22.6倍PE，中外運又係平咗一大截。
又中外運明年預估0.97倍PB，上邊外運發展2.35倍，UPS更高達23倍。齋睇「表面」PB，中外運已經平霸，若果計埋嚟自外運發展近82億港元股本凸章增值，中外運實際PB係得0.7倍！
隨住中集同中遠系統停牌搞重組，市場亦一直憧憬，場內餘下海航同物流瓣數，亦有重組動作。今年8月中報載中外運話，過去兩年，阿媽都有向集團注資，所以，預期今年都會獲阿媽注資，時間預計喺下半年。家陣已10月，即係話，炒注資，應該越嚟越有機。
8月以嚟，10間大行有7間叫買中外運，平均目標價6.43元，即集團現價要升近60%，博升30%到5.3元，中外運預測PE都係12倍，未有耐炒爆。
錢雋
細價股專家
本欄逢周一、三、五刊出
錢雋
一周三件 - 錢雋 舊文