金融High Tea 2015年10月9日
跌好過升
2015年10月09日
A股黃金周後復市，滬深兩市如期造好，分別升3%及4%，港股偷完步後又如期腳軟。恒生指數一開即回，開市的22588點已是全日高位，雖然內地股市向好，但港股午後一度跌314點，尾市跌幅收窄，恒生指數收造22354點，回吐160點；國企指數收報10287點
，跌107點，成交縮減至935億元。
經紀張牙痛咁聲，話呢排股市升番，散戶心情剛剛好一些，多啲人打電話畀佢，但昨日內地升港股跌，認真唔老黎。
我話我唔係咁睇。由於內地股市國慶後復市會升，係人人都估到的事件，所以昨日先升後回，差不多係命定，真正值得睇的是升幾多、回幾多。現在係升得唔多，亦回得唔勁，唔係壞事。若然相反係一升升上23000點，然後一插又插番去22200點、甚至22000點，咁呢浪反彈就玩完啦。如今升得少又回得唔多，期指又轉高水，似再打吓底，又再玩反彈。
遵理上市 行家踩場
昨日八卦話題係正申請上市的補習學校遵理集團被人挑機。遵理遞咗表擬於主板上市，但行家現代教育昨日於報章刊登全版廣告，向遵理的中文科補習天王林溢欣招手，開價年薪8500萬港元，利誘他過檔，好多人話如果佢咁搞，會唔會打亂遵理上市部署呢？
好多人都話，升中試取消後，補習社黄金期過去，因為以前有會考和高考兩個試，如令得番一個試，補習公司生意大減。遵理上市文件顯示，公司2013、14及15年度，溢利分別為1810萬元、2508萬元及3077萬元。3000萬盈利，係啱啱夠主板上市的門檻，上市隨時都係「啤殼」，一個主板殼值5億，「啤殼」好過教書啦。
今趟鬧出對手現代教育玩嘢事件，如果遵理要鬥擲銀彈去留住天王，隨時搞亂上市條數，唔排除今次踩場，都係唔想對手咁易上市。
電能股東樂坐順風車
呢排新股唔理旺淡都有市，昨日多隻新股首掛撞正市況好番啲，捧場客變咗有運行，IMAX中國(1970) 收報34.25元，較招股定價31元，高出10.5%；內衣產銷商維珍妮(2199) 收報6.5元，較招股價5.6元高0.9元或16%，回報相當唔錯。以配售方式於創業板上市的幾隻股價更加炒到開巷。
長實地產(1113) 宣佈投得將軍澳日出康城第八期項目。最近長和系撤資之說鬧得沸沸揚揚，但管理層在公佈投地消息後明言同傳聞無關，即係話公司唔會用錢去作政治表態。今次地皮補地價係歷來的項目最高，咁即係話李超人對樓市有信心啦。
有中環茶友話，長和系重組後，長實變成專注地產，名下只有收租物業，再無由和黃貢獻的零售，能源業務，唔知係咪咁原因，加上改組後財力更加充盈，所以佢要密啲手投地，希望食多幾鋪胡。依家政府拚命增加土地供應，同時又多啲內房商嚟香港買地，加埋本地龍頭財團唔肯讓位，所以雖然賣地多咗，但地價仲係唔肯跌喎。
另外長江基建(1038) 合併電能(006) 方案加碼，除調高換股比率外，同時將特別派息大升五成至7.5元，消息公佈後電能股價再升，收報73.65元，升1.3%。今次加價解釋係反映最新巿況，意思係個市升升，股價變咗，所以調高代價。對收購代價，基金用人家的錢投資，點都要買股，所以要認真計數。從小股民角度，合併消息推高股價，搞得成就有錢落袋，賺咗可以換馬，可以套現投資其他工具，甚至遊埠消費，否決的話股價可能插番低，所以考慮未必一樣。至於併購條件加碼，小股民有順風車坐，當然係多多益善啦！
陸羽仁
金融High Tea 舊文