一周三件 - 錢雋 2015年11月16日
一周三件：
大健康超班馬
■截至上月22日止，金東濤共增持大健康約9,000萬股，合共2.6億元。 資料圖片
大健康國際（2211）主席，喺派完半年成績單後起勢增持。集團係東北省最大零售、分銷商，得8倍預測PE之餘，兼拍住大孖沙阿里健康（241），如虎添翼。一於二仔底，跟買大健康。
拓健康產業升呢
大健康喺9月10日出半年業績報告，無耐到16號，掌舵金東濤出手增持。到上月22號為止，金生共增持集團約9,000萬股，真金白銀2.6億元。而最貴一板嘅每股成本價3.67元，大健康現價3.11元，潛緊水15%。又經呢期增持，金生亦由原先揸47.14%，去到家陣超過50%水位，之後想點增持，就海闊天空。
大健康前稱金天醫藥，今年7月先改名，標誌集團升級到瓣數潛力更多，潛力更勁嘅健康產業，同線上領域。賽迪顧問報告，祖國醫療健康產業喺5年後總規模，超過8萬億元人仔。又業界以美國醫藥網購佔比計數，祖國藥品網購規模，可以去到5,000億元人仔。
大健康食住個勢「升呢」，喺東北省又超曬班，加埋係阿里健康喺東北平台嘅合作方，集齊優勢，照計更快彈出。
又健康產業係熱爆主題，場內恒大健康（708），一年累升40倍過外，市值過百億，係大健康嘅兩倍，但仲未有專業預測。而國藥（1099）、同仁堂（8138）明年預測17倍PE，祖國同樣搞連鎖嘅一心堂（深：002727），更去到37倍PE。大健康今、明兩年預測EPS0.33港元同0.36港元，明年得8.6倍PE。平咗大大截！
買大健康，當上番7間行建議平均目標價4.25元，要升37%，明年先得11倍PE，未有耐追到行家。
錢雋
細價股專家
本欄逢周一、三、五刊出
錢雋
一周三件 - 錢雋 舊文