財經評論：二按好幫手？
■紅磡環海．東岸的發展商九建可為買家承造35%二按，一、二按累計最高按揭95%。 資料圖片
臨近年尾，發展商一如以往，個個爭住跑數谷銷售額，但今個年尾更加要同美國鬥快跑，即係同息口競賽，盡力在正式公佈加息前散貨套現。如是者，各大發展商紛紛努力出招吸客。
回想起兩年前政
府拒撤辣稅，龍頭地產商新地（016）旗下，位於九龍站的天璽牽頭「送稅」，提供一系列稅務津貼以及回贈優惠，成功為樓市「解辣」，掀起一手物業認購熱潮。自此，一手樓價按價單打折已是業界常識。打九折是基本、打八五折是合理，打夠八折就會予人劈價的感覺。
不過，呢個遊戲規則玩咗超過兩年，無論是買家、代理甚至是地產商本身，對規則已經無曬新鮮感，一手樓銷情近個幾月都經常見到賣唔曬的情況。如是者，發展商索性自己做埋「財仔」，提高按揭成數吸客，最經典一定要數九建（034）劏房之城紅磡環海．東岸，發展商系內財務公司可以為買家承造35%二按，一、二按累計最高按揭95%，即是付5%首期就可以上車。就連藝人「麥包」麥長青都成功當上該劏房新盤業主，坦言會考慮做九成半按揭。
隨時一街負資產
雖然有關九成半按揭招數以往都有銀行及按揭證券公司推出過，在淡市以低樓價吸引年青人上車。然而，如今香港地產商故技重施，但處境不同的是，當下樓價仍處歷史高位，市場上幾乎無人敢講香港樓價會再上，只要樓價稍有回落，隨時一街都係負資產。
再者，金管局雖未有採取甚麼回應行動，但早前提醒銀行要遵照3月所出的監管指引，若整體按揭成數較金管局容許的最高按揭成數超過20個百分點時，銀行容許業主供款佔入息上限（DSR）應調低5個百分點。所以呢，到底九成半按揭是上車客的大好幫手抑或糖衣毒藥，香港人，心裡有數吧！
記者：黃嘉銘
財經評論 舊文