金手指：都會駅買得過？
■都會駅於大約10年前，樓市未爆升時開售，故買家到現在都有錢贏。 資料圖片
各位fan屎！好耐冇見！孫柏文對上兩個月走咗去見工選區議會。過程專心，不過有投資新見解，就係對我調景嶺選區嘅屋苑城中駅同都會駅。今次因參選想更了解選民所感，所以就搬入。
咁屋苑點？大家
要明，價格最終由租金帶動，而租金就係被好唔好住左右，我唔覺得都會駅會有咩突破。點解？有兩個因素。首先，都會駅本身係喺大約10年前，樓市未爆升時開售。由開售至今任何一刻買嘅人，𠵱家都係贏錢，有啲仲要以百萬計咁贏。所以該屋苑內，有種近乎自大嘅濃烈感覺。
調景嶺似港島伸延
同時，雖然政府標籤為新界，不過我住咗嗰度之後，發覺調景嶺係港島嘅伸延，似東區多過似大埔。不過，同居民傾偈後，發覺調景嶺係subprime嘅港島，兩個喺中環返工嘅同事，一個住太古城，另一個住調景嶺時，就會有種被睇唔起嘅感覺。
當呢種自卑撈埋自大，就會變得排外同過度活躍，例如會所洗手盆旁會有「洗手盆只供洗手」嘅牌（呢點選舉時有用郵遞同居民分享，所以即時冇曬票）。喺屋苑成長嘅小孩，10歲已考六級琴，不過你跟佢尾過大閘時，唔會望後，更唔會幫你頂一頂門。
你想避開呢種屋苑，有3個特徵要留意：業委會（而唔係業主立案法團），業委會要員（例如主席）做埋區議員，同埋係港鐵（066）管理。三樣加埋，極容易腐敗。選舉期間，當作為候選人嘅業委主席，為繞過競選開支限制喺屋苑擅自搵人入郵箱違規，要幾肆無忌憚先敢咁樣做？
天網恢恢咁俾人捉到時，管理處一句「警告咗喇」了事，而對我哋其餘3個水魚唔會做同一件事，而會即時報警。而大家唔好諗住廉政公署會查。所以，大家買樓一定要做埋呢樣功課先買。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文