買推薦股要低吸
2015年12月16日
美國開會議息前夕，港股一度攀升，頗有加息壞消息兌現前偷步入市的感覺，但買家意欲唔強，交投唔係咁夠力，加上內地仲係低迷，最後恒指難逃九連跌。要留意係歐洲股市早段高開，反映市場開始消化美國好大機會加息的影響。
恒生指數收造21274點，跌35點，連跌9日累挫1205點，是逾31
年以來最長跌浪。國企指數就繼續反彈，收報9344點，升28點，成交金額671億元。新股破底情況未變，義齒器材供應商現代牙科(3600) 首掛，全日收造4.04元，較招股價4.2元，下跌3.8%。
復星系疑慮未清
內地有報道指，截至9月末，復星(656) 負債率降到只有53%，但「復星系」的剛性負債估算超過900多億元人民幣，債務主要包括銀行借款、應付票據、公司及子公司發行的各類債券。雖然標普評級先一日已發表報告，指復星評級和展望不受集團董事長郭廣昌協助相關司法機構調查事件直接影響，但市場對公司前景仲係有點不放心，令債務問題受關注。
雖然復星大老闆重新露面，又話不排除會回購股份，但在財政惹關注下，復星系股價續捱沽，復星倒跌3.3%，造11.68元；復星醫藥(2196) 下滑4%，報21元；復星醫藥持股的國藥(1099) 降3%，造30.73元，為包尾國企成份股。
國指今個星期表現好過恒指。年尾大行開始問前程，德銀發表報告指，認為內地經濟自2012年進入新常態，未來數年經濟會經歷周期性復甦及結構性放緩，估計明年中資股走勢出現「N」形走勢，明年上半年國企指數會升至11600點，即相當於現價升23%，到明年底國企會回落至一萬點大關，但仍比今年水平有10%回報。
該行認為，在新常態下要在股市賺錢，投資者持有的股票需要有長期盈利增長，同時選擇受惠宏觀政策兼估值低的舊經濟股份。該行建議增持金融、工業及資訊科技股，減持通訊、能源及日用品股，至於消費、公用、醫療及原材料股只會與大市同步。
兩電醒目自動減價
該行仲挑選2016年十大中資股，當中有7間在本港上市，包括中海外(688) 、平保(2318) 、招行(3968) 、華泰(6886) 、港交所(388) 、中國建築(3311) 、中航科工(2357) 。
德銀推介呢七隻股份基本上都係穩陣同熱門股，如果要買喺邊個水位入市好重要。依家從行業睇，內房會受惠內地減息，行業會比較有利，中海外股價就較高，最好等佢下調吸納，金融類保險股感覺上好過銀行股，港交所股價唔平，華泰做經紀業務上落大，比較上平保似乎吸引啲。
昨日講起今年同往年唔同，加價聲變減價聲，話口未完兩電就話明年會減電費，中電(006) 減約0.9%，港燈(2638) 減約1.1%。中電總裁潘偉賢仲話，如能源價格維持現時水平，有信心2017年可凍結電費。
之前市場傳話兩電會凍費，喺油價同煤價大跌下，相信兩電唔減價，市民好難收貨，依家主動提出減費，不過主要係燃料費下調，基本電價都繼續上升，如果呢個建議可以過關，其實已經好好彩。睇番中電同港燈信託，中電今年表現平穩，叫做賺咗股息，港燈仲上高位，證明喺行行淡風下，電力生意已經叫做好做啦。
陸羽仁
金融High Tea 舊文
來源 source: http://hdfin.stheadline.com