笑到最後：集體中伏記
最近流行一種新的寫標題手水法，叫做「真．XXX（人名）」，源於毛記的文體。對於大部份的傳統媒體用呢種方法去表達，高明不以為然。高明所知，毛記一向自行用戲劇手法拍攝虛構嘅情節，一向都係假，公信力不足，所以當佢訪問一啲真人嘅時候，先會話受訪者係「真．XXX（人名）」
；相反，大部份傳統媒體，包括《蘋果日報》，一向都係訪問一啲真實嘅人同埋事物，既然一向求真，就冇必要標奇立異話自己係「真．XXX」訪問，高明即刻諗，其實傳統媒體做嘅嘢一向都堅過石堅，唔使話自已「真．XXX」去表達，反而會令人質疑一向嘅方針。一向都係做開真嘢，冇必要話自己係「真．XXX」。
入正題。本欄喺舊年8月17日話，《歡迎進入大型悶熊》當時恒指係23991點。可惜嘅係，本人一路都冇沽空，因為太懶，見跌緊不如瞓晏少少，起身食埋飯都差唔多收市，不如唔好搞咁多嘢，所以乜都冇做差唔多半年。所謂「萬般帶不走，惟有WhatsApp隨身」。1月19日，星期二，一早被WhatsApp群組鈴聲叫醒咗我，有人話覺得見咗底，因為好多技術指標都話個市好平。
反彈市教訓有三
高明當然唔信，繼續瞓。午市中段，終於起咗身，另一個group內有人同我講，話越殘越愛，因為已經見咗底。「都唔信」，中午開市後升都係咁話，高明繼續做自己嘢。到臨收市時段，有唔太炒股嘅朋友，send一段新聞過嚟，大意係叫人唔好買之類。嗰一刻即刻諗：其實想撈好耐，一路都扮唔知，今次技術指標又中，一向睇開嘅明燈指標又中，唔買對唔住自己喎。
最後，喺近乎all-in入市，首選當然係港交所（388），因為大隊都係推港交所，升一定會跟到。久疏戰陣，其中有個股票戶口直頭唔記得密碼，如果唔係會用爆孖展追入博反彈。
追入當日個市好似反彈，翌日恒指收市跌749點報18833點，連埋牛熊證同狗衝嘅正股，一日唔夠輸多過兩成，純投機所以即斬，牛證則強制止蝕，故事教訓：1.一路都睇淡，其實突然睇好係違反自己嘅睇法，而且唔係第一次，今次輸係抵死；2.一向覺得自己嘅睇法係正確，但有時都會受到朋友影響，記住，自己睇法，衰都係衰自己；3.盡可能唔理WhatsApp內朋友嘅意見，還原基本，睇番自己分析，不過好難。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com