利字當頭：大炒家懲股場老千
■李小加作為港交所總裁，就好似賭場話事人，最緊要令賭注有增長。 資料圖片
李小加最新言論，又吹縐了一池春水。話說，他在堅持推第三板的時候，像吞下了「誠實豆沙包」一樣，承認股市上有「老千股」。
賭徒：「我竟然有少少鍾意咗佢。」最愛在刀口上搵食的賭徒這樣說。師
爺：「你估個個都學得你一樣當股場係賭場？好多公公婆婆家陣買股票當存款。如佢哋買咗妖股，之後日日去港交所、證監抗議，你代老闆出去接信？」
賭徒：「十賭九騙，願賭服輸。邊個叫你哋師爺講到只要做足功課，就一定贏錢，抵你哋俾人鬧。當年，雷曼個招牌夠大啦啩？跌落嚟咪搞到成條皇後大道中都係示威者囉。」師爺：「納稅人出糧畀我哋，唔做啲嘢點得呀？」
賭徒：「你知唔知我同你最大分別係乜？就係我知道投機有風險，亦冇可能逃避，你哋就雖然好驚風險，但又唔明白咩叫風險，所以好天真以為可減低風險。李小加作為交易所總裁，其實只係賭場話事人，最緊要令賭注有增長，至於閣下輸贏，貴客自理；甚至乎，場內放數活動，佢都只會隻眼開隻眼閉。」
師爺：「搞到成個場都係老千搵食，邊有散客幫襯？最後咪又係死路一條？」賭徒：「散客值幾多錢？至於打擊老千，你真係識條鐵？一日都係你哋搞到咁難沽空，先至會做到隻隻殼都敲落有迴音！夠膽，咪放寬沽空囉！只要沽空成本合理，我肯定有國際級對沖基金入來，教訓妖股。不過，我睇死你哋唔會。唔信？賭幾多吖？」
利世民
http://www.facebook.com/leesimon.hk
本欄逢周二、四刊出
利世民
利字當頭 - 利世民 舊文
來源 source: http://hk.apple.nextmedia.com