智取大市：兩會開幕三大失望
■在中國金融亂局火燒眼眉之際，李克強只發表一份「務實」嘅報告，好難畀到市場信心。 資料圖片
國務院總理李克強發表嘅政府工作報告，兩個字講曬──務實，不過喺中國金融亂局火燒眼眉之際，仍然只發表一份「務實」嘅報告，就似乎用「離地」嚟形容更為貼切。
第一個失望，係
工作報告未對解決一行三會監管問題落墨。過去大半年暴力救市令資本市場一度陷於癱瘓狀態，然後中央實施外滙管制，但一份咁重要嘅工作報告內，竟然無正面提出改善問題嘅方向，咁好難畀到市場信心。
第二個失望，係報告內容唔少舊酒新瓶，新提嘅減稅5,000億元、投資聯動，對經濟金融有幫助，但遠遠不及改善根本嘅金融問題。睇完報告，好難相信單靠一直搞極都搞唔掂嘅去產能、去槓桿，喺金融體系、國企百病纏身之下，有能力成為改善經濟嘅最大動力。
第三個失望，係對於反貪腐問題只重彈舊調，莫非中紀委拉下人，然後唔畀啲高官出去飲飲食食就覺得係反貪腐成果？喺工程環節食夾棍、分銷商同製藥企業之間「抽傭」令全國人民捱貴藥，種種問題繼續摧殘企業價值。最根本、最重要嘅問題，中央原來想理又理唔到，就索性唔提。
你大可以話政府工作報告向來冇提呢啲，亦唔代表冇做嘢。其實，係收埋招數未講？還是領導班子對問題束手無策？往績睇係後者居多，就睇嚇呢項利淡因素幾時反映。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com