金手指：一注續買白銀
■白銀同黃金，兩者都係神賜給世人嘅貨幣。幾千年來嘅購買力，都係穩定、可信。 資料圖片
上周二，孫柏文應承過今周向所有白銀戰隊成員講我對白銀睇法。原因係啱啱嘅星期日，就係我叫大家「一注獨贏買白銀」十年到期日。如你買咗實貨白銀，係白銀戰隊成員，你應會問是否繼續揸住。
首先當年我叫大家買白銀一個好主要原因，因白銀同黃金都係神賜給世人嘅貨幣，幾千年來嘅購買力都穩定可信，而人類歷史以來，所有人造貨幣最終都係零。
2016年所有貨幣都已進入瘋狂狀態。2009年各大央行將貨幣利息踢到落零厘，已係史無前例。除咗零息，仲有常見嘅印銀紙，即啲學者跟住啲央行叫嘅「量寬」。
兩者雖然令白銀喺2011年升到每盎斯50美元，不過之後全球因繼續過份投資，令商品價格反而通縮。個步驟就係零息令好多只要攞番本嘅投資都有人做，所以繼續有人全球咁起鬼城。甚至原材料（例如銅）可做抵押品，借幾次錢，所以令好多地方大開特開新礦、新油田。
原來最終需求係人為谷出來，當價一冧，就無自然需求接。啲礦公司個個都借咗好多錢，要還息時，低賤嘅價錢都要繼續生產，令商品跌凸。問題去到呢個位，央行技窮，歐央行、日本相繼出負利率。
如20世紀最害世人嘅係馬克思，咁21世紀最害人嘅必定係凱恩斯。負利率就如向儲錢嘅人收稅。我問啲忠實fans中實力最雄厚的師奶們：「如銀行存錢要收息咁點？」佢哋異口同聲：「咪提款擺保險箱！」對師奶來講，去銀行櫃枱同去銀行保險箱攞錢功能一樣，但對銀行來講就係擠提！所以世界各地都有聲音話要禁紙幣，迫你擺番啲錢喺佢哋能抽稅嘅戶口中。佢哋輕則學大陸用盡方法令你冇得攞走，甚至會宣佈喺某日前要存款，之後某面額嘅鈔票同日本軍票一樣，作廢。
到時世人唔想被抽稅，又唔想手頭上隨時攞得走嘅流動資產作廢，就要搵地方躲藏。係乜？咪就係黃金同白銀囉！咁點解白銀好過黃金？下周繼續。
孫柏文
獨立股評人t
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com