財經評論：勿讓家人瞓街
■勿讓層樓綁青春，我崇拜，但我更深信勿讓家人瞓街頭。 資料圖片
朋友A抽中白居二，見到樓市跌成咁，中籤唔知是好事，還是惡夢的開始。他問：「𠵱家應該用白居二上車嗎？」
潛台詞是：「希望可以低買高賣，睇住層樓年年升值，紙上富貴，唔要負資產咁閉翳。」
敷衍答，點答都得。負面講，
咪供應不斷增加，息口會升，樓市實跌啦！掉轉講亦得，供應唔係一步到位，美國加息唔會咁快，樓市下半年反彈。
買樓是一場博弈
不過佢是真心膠，hea答對唔住自己，一於借呢度，同你做功課。朋友A家陣每月9,000元租粉嶺私樓400呎2房，同區居屋今年1月一個381呎單位未補地價成交價200萬元。一成首期20萬元，息率2.15厘，分25年還，月供8,080元。供樓平過租樓，當然居屋與私樓質素有別。
出面有人話樓價衰3年，年年跌一成，今日200萬元入市，3年後咪跌到140萬元，輸60萬元。但3年來一直租樓，業主大發慈悲，年年唔加租，3年租金都要32.4萬元。
假如樓價唔升唔跌點算？租金是潑出去的水，永遠收唔番。幾年前啲樓市專家都話樓價有排跌，記得有個吹到跌五成，結果升到你唔信。今日轉勢，究竟跌到你唔信，還是短暫陣痛，天曉得。
買樓是一場博弈，賺價賺住邊個唔想。今日買樓唔係聽日賣，一住都三五七年。樓價跟通脹，通脹年年漲，睇番超長線，就算唔賺價都賺到個住吧！
勿讓層樓綁青春，我崇拜，但我更深信勿讓家人瞓街頭。講緊上車盤個價先200萬元，月供才8,080元。當然唔想被層樓綁，今日租樓唔買樓，拎住20萬首期去股市馬會賭一賭，隨時變李嘉誠，但我深信人生揼石仔。人和事、財與產是揼出來的。
記者：陳家雄
財經評論 舊文
來源 source: http://hk.apple.nextmedia.com