買個電影夢
2016年03月08日
阿爺加大赤字谷經濟，港股高開，但個市彈上兩萬點，投資者戒心開始加大，高位有人選擇食胡，最終略為回落收市，估計個市就算再上，可能都要先回吐打打底。
港股好淡爭持，恒指早段最多曾升155點，高見20331點，跟住沽盤明顯增加，大市掉頭低見20095點
，轉跌81點，恒指收報20159點，跌16點；在內地開兩會的效應下，國企指數表現好過大市，收報8626點，升68點，成交金額749億元。
阿里彩票股癮頭短
大行呢排唱好個別中資股。長城汽車(2333) 首兩月銷售升7%，摩根士丹利讚SUV需求續旺，股價大升10%，造7.03元，是表現最醒的國企指數成份股，其他車股表現普遍唔錯。
三四線股方面，阿里巴巴進軍互聯網彩票業務，斥資23億元入主亞博科技(8279) ，阿里效應今次唔係好得，股價先急升後瀉，收造1.84元，倒挫7.5%，若在高位2.25元追了貨，即日唔見18%；反而其他彩票股則落鑊熱炒，華彩(1371) 彈升10%，報0.285元；匯銀智慧社區(1280) 急升13%，報0.69元。
睇番亞博科技市值有86億元，一年低位係0.54元，之前股價仲低。本來，有阿里咁強大後盾，加上彩票業務係可以高度網絡化的生意，照計應該炒到飛起，現在佢咁反應，可以有兩個解釋。一個係阿里點起火頭好多，但暫時未見到邊間佢入股的公司有真正成績出來，令概念股叫座力減弱。另一個解釋，就係有低位入貨的股民，趁住好消息就出貨食胡，要消化呢批貨之後先有力再炒。兩個原因無論邊個中，都反映大市唔係狂牛狀態，就算投機都會因住嚟玩。三、四線股炒吓停吓，甚至趁好消息出貨。
另一個例子係十方控股(1831) ，持有內地票房淨收入55%的電影《葉問3》上周五在內地上映，首日累計票房錄得逾1.3億元人民幣。十方股價不升反跌，收市報2.97元，插咗17.5%。
電影有夢工業的稱號，被視為不受經濟環境影響的行業。甚至有人話經濟愈差，電影愈賣座，因為人人買張票入到電影院，就可以買個夢，係逃避現實的最廉價方法。睇番內地電影市場，又有少少咁味道。內地票房不斷創新高，港產片仲成為大贏家。繼《美人魚》後，《葉問3》同樣好賣座。
《葉問3》好消息出貨
不過，睇番電影開畫前，十方股價已反覆炒上，由去年10月低位0.45元，2月尾升到高位3.75元後回吐，未開畫已經見到股價有壓力，開畫後就直插落嚟。
雖然《葉問3》好收得，但計計數，就算電影收30億元，基本上院商已經佔一半，再扣卡士費同其他宣傳推廣，片商落袋如果有10零億都算係咁，跟住十方分55%，大約幾億元落袋。不過，跟住幾時再有下一部賣座片，公司用甚麼價錢傾返來，都係一個問號。以十方目前股價係淨值9.5倍，估值唔易支撐。
以前搞電影好有三更窮、五更富的味道，近年荷里活大公司好似迪士尼，靠超級英雄片開拓相對穩定的收益，但中港電影業暫時仲未做到呢步。好似十方，據集團執行董事兼行政總裁徐小明透露，未來都係靠透過收購已製作完成的電影、委託拍攝等多種模式進行投資，一如公司投資1.2億元人民幣，收購「3D葉問3」收益權，目前還有兩個類似項目洽談中，希望下半年至年尾前有望可落實，所以中國電影增長強勁，大家走去買佢，都係等如買一個中國電影夢。
陸羽仁
金融High Tea 舊文
來源 source: http://hdfin.stheadline.com