笑到最後 - 高明 2016年4月11日
笑到最後：
龍蝦女將取代馬雲
■梁振英涉濫權違規叫地勤代帶行李過關不久前，中國剛剛通過「海淘新稅」。
龍蝦女梁頌昕Daddy濫權違規叫地勤代帶行李過關，如果有留意「國情」，就知闖關事件時間太巧合，巧合在於中國啱啱通過「海淘新稅」，有人用佢老豆權勢去「屈機」，一旦成事，就係阿里巴巴嘅末日。
但凡所有成功生意都要靠屈機，即係得你做到，人哋做唔到。而喺中國，屈機多數都係做生意嘅人有特權，只得佢一個做得，咁想唔發都幾難啦。
「海淘（中文：網上境外購物）」新稅大致上係上網購買進口貨要抽稅，海淘最低繳稅11.9%，新稅令進口代購網死曬。據中國報道，新稅係想中國人用國貨，所以網購要抽稅，但係中國人就最唔鍾意用國貨，特別係畀小朋友食嘅奶粉，中國買嘅會食死人，惟有買外國奶粉。根據財政部等發佈嘅「跨境電子商務零售進口商品清單」，配方奶粉等嬰兒用品喺清單之列上。你以為畀稅就買到外國貨？中國網上傳媒話，新稅實施後，好多網購都「不能正常發貨」，有錢都買唔到。
咁同梁頌昕有乜關係？中國財政部3月24日公佈新稅，並會喺4月8日實施，據報梁頌昕3月28日刻意闖關，新稅實施前咁急上機，時間上邊會咁巧合？估計原因，有人覺得新稅係「中港機遇」，為嘅就係試探香港機場可唔可以俾佢屈機。
成為中國「超級連繫人」
因為香港有限奶令，一般香港人係「普通連繫人」，帶奶粉過關只係帶到兩罐，有啲人可以打電話畀特首Daddy，帶乜過關都免檢查，先有資格做「超級連繫人」。而全中國只有一個「超級連繫人」，嗰個就係梁頌昕。
上次梁家測試機場保安，結果一個手袋輕易免檢過關，有此先例，加埋保安局、民航處現任前任阿頭講明放行梁振英一家，下次帶一貨櫃奶粉帶過關，都會有地勤護航，「熟客」分分鐘連運費都慳番。加上中國關口，梁振英有自己方法過關，乜嘢海淘新稅，隨時都免繳。梁家運嘢過境免檢免運免稅，成本平人一大截，其他「電商（中文：電子商貿網站）」點夠梁頌昕鬥？
好多人唔明，漏咗個袋喺出面，點解唔用錢解決？例如龍蝦買張機票入閘，帶番畀龍蝦女就可以解決。
其實佢哋一家，係為咗幫興趣多多嘅梁頌昕鋪路，因為龍蝦女實習金融機構、國際組織可能已玩厭，突破中國稅制漏洞，成為新一代「電商」霸主，可能係梁頌昕新興趣。點解咁趕要上嗰班機？唔排除今次佢係去美國買奶粉！所以走得咁急趕住上機。
至於本欄今日嘅財經angle係乜？就係一注獨沽阿里巴巴！因為機場大、馬雲大，都不及特首最大。淘寶天貓京東嘅生意有幾勁？梁頌昕打個電話畀Daddy就超越佢哋啦！
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com