智取大市：
債轉股金融大破壞
■如債轉股同時，作為股東的內銀沒有大刀闊斧整頓企業管理層，只會後患無窮。 資料圖片
「債轉股」最近有新發展，消息話首批規模達到1萬億人仔，應該如何量化？畀大家一個參考數字，包括工、建、農、中信銀行等，連同國家開發銀行在內嘅9家內銀，去年底淨資產大概8萬億
人民幣，簡單類比就知「債轉股」規模甚高。賬目上，內銀嘅資產轉移，就由正常類貸款為主嘅貸款資產，變成1萬億人仔嘅中國最劣質公司股權投資。長遠透過「債轉股」得番嚟嘅爛股權投資，佔9家內銀8萬億人仔當中嘅多少，大家可以想像嚇。
大型內銀審批貸款從來以政治考慮為先、風險管理其次；而內銀入股企業客戶後，大家一家親，內銀順理成章借多啲錢畀自己人。按華榮個案，「債轉股」令股本大幅壯大，內銀有條件以股東身份不停灌水借錢畀佢，貸款形成完美錯配之餘，企業做得夠衰，貸款議價能力同埋市場破壞力反而變倍。如果「債轉股」嘅同時，內銀作為股東，冇大刀闊斧整頓企業管理層，只會令央企、國企管理層鬥做得衰，然後透過「債轉股」令企業規模變倍，變成劣質企業有獎制度。
「債轉股」或許可以頂住中國暫時唔出事，可能一年半載之內活化國企貸款能力，而令股市、經濟可以出現小陽春，但長線會更大規模咁衝擊金融體系，呢一刻睇，毫無疑問劇本係比日本廿年前慘得多，小弟喺度想講三個字：「收手吧！」
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com