一周三件：煲億和大翻身
■億和應客戶要求，到越南建立工業園。圖為集團主席張傑。 資料圖片
億和控股（838）主打高精密生產瓣數，已經link up到高科技企業同越南呢個高增長市場，加埋做足防範人仔再貶值措施，煲億和今年大翻身。
億和上年盈利倒退26%，到2.05億元，但當中，包括咗人仔
滙兌虧損2,163萬元（港元．下同）。去年7月打後，億和將等值9.85億元嘅人仔存款，大幅減到上年尾時嘅2.64億元水位。諗到係，人仔就算再貶值，影響極都有限。
又億和應客戶要求，到越南建立工業園。廠房今年投產，為當地工廠提供服務之餘，兼踩多步到高端電子消費品範疇，同透過客戶海外網絡，擴展環球市場。
越南上年GDP增長去到6.7%，創5年新高，今年第一季，越南GDP增長仲keep喺5.46%。又世銀研究報告話，隨住越南加入跨太平洋夥伴協定，越南將會係最大受惠國。億和食正越南經濟起飛期，加上密切客戶關係，嚟緊嘅日子，掂過碌蔗。
再講，億和亦獲得航天同衛星生產嘅國有企業、無人機開發嘅知名深圳科技公司定單。可見億和的生產技術，獲得高科技企業認同之餘，食住上，又多條高毛利嘅財路。
當億和今年盈利無變，但今年再無人仔貶值影響，一個來回，盈利已經額外增長近11%，到2.27億元。又連埋新越南廠房、高端電子消費瓣數開拓，億和盈利去返2014年時近2.8億元，增長37%，EPS0.15元，現3年海底價1.16元嘅預測PE值，再跌到得番7.7倍。
煲億和，當翻半番到1.74元計，今年預測11倍PE值，都仲未上到過去5年平均19倍PE值。
錢雋
細價股專家
本欄逢周一、三、五刊出
錢雋
一周三件 - 錢雋 舊文
來源 source: http://hk.apple.nextmedia.com