Money Walker：yen越放水越強之謎
呢幾年講到外圍財經新聞，焦點多數都係關於貨幣戰，不過自從戰況白熱化後，就出現咗越係放水，滙率就越走強嘅奇怪現象，唔信你望嚇日yen同歐元嘅走勢。
寬鬆貨幣政策效果越來越低，加上聯儲局講咗加息咁耐都只係加咗一次，都係歐元同
日yen能力抗地心吸力嘅原因，但原因其實唔止咁少。
路透早排一篇報道提到，一國利率對實質貨幣滙率嘅影響只得18%，咁剩低嗰82%嘅影響係乜？答案係一隻貨幣嘅滙率，仲會受到該國嘅通脹率、生產力同埋出口商品質素高低等影響。
理據亦唔難明白，一國經濟越差，通脹就自然越低，通脹越低，該國貨幣就越見使，滙率會越強。
咁高生產力同有高質出口嘅國家，滙率點解會越強？因為呢啲國家出口較多，出口較搶手。
其實各國央行自己亦明白搞咁多嘢都唔太收效，但蹺埋雙手等經濟死亦都唔係辦法，因為會導致外界對央行失去信心，結果央行就陷於寬鬆幣策極限與按兵不動損害市場信心嘅兩難中。
金融海嘯後，但凡經濟同金融市場有乜冬瓜豆腐，央行就會出手救市，但當央行措施已經越來越唔work，當再有危機發生，市場以後就唔可以再憧憬事情可以一如過往咁，諗住有央行出手就一定有驚無險。
之但係講到尾，大家最關心嘅問題都係日yen仲會唔會再升，筆者就傾向覺得會，因為經濟大環境中期預料以避險為上，而且日本央行暫時似乎都仲未諗到有乜新招壓抑日圓升勢。
El.
本欄逢周二、五刊出
El.
Money Walker - El. 舊文
來源 source: http://hk.apple.nextmedia.com