財經評論：樓市冧價炸藥
■大圍嘉順苑平均呎價比同區居屋現價貴至少兩成。 資料圖片
抽唔到新居屋我失落，但當我看行家報道：「房委會資助房屋小組主席黃遠輝承認因等候房協籌備銷售安排，(去年)9月定價後半年才接受申請……」我安樂，因為相信今批居屋定錯價、唔貼市、堅離地。
心儀大圍嘉順苑，行家報道「嘉順
苑呎價6,828元創新高」，這是平均價，都比起兩年前同區美柏苑及美盈苑最貴的單位貴4%及6%，比兩苑最平單位起碼超三成。因為位處高了半截的山上嗎？嘉順苑去年9月定價，美柏苑及美盈苑價單印製日期是2014年12月10日，反映整體二手樓價的CCL去年9月比2014年12月升10%，然去年9月樓市轉勢，目前CCL跌至127.46，比2014年12月倒跌4%。
嘉順苑市價七計定價，推算補地價後呎價約9,754元。附近嘉田苑，上月有一宗已補地價成交，A座低層戶，實用469方呎，已補地價呎價7,996元。一單成交不足支持，咁睇多宗，今年2月底，三座高層戶實用469方呎，未補地價成交價360萬元，呎價7,676元。2018年才入夥的嘉順苑比即刻住得的同區居屋現價貴至少兩成。
黃遠輝今年2月中表示，居屋今年7月揀樓前，不會調整售價，但屆時有需要，將調整折扣率。這個與近期One Homantin減價的手法雷同。紀惠集團行政總裁湯文亮話，發展商見唔對路寧願封盤，都唔會劈價製造恐慌，恐怕越劈越讓人心慌。定錯價，賣唔去，係發展商的死罪，但居屋滯銷不見有人因而下馬。貿然封盤，吽臭丟空勢將惹來抨擊。好聽啲嘅「調整折扣」咪就係劈價，連居屋都劈價，恐怕是製造下一浪跌市的引爆點。
政府取向會影響市場，如公務員加薪幅度是私企參考指標。不過明明製造炸彈，到頭來可能功德無量，因為符合大眾對樓價下跌的期望。市民唔係黑心，講白啲，越想樓價跌的人，其實就是最想買樓的一群。
記者：陳家雄
財經評論 舊文
來源 source: http://hk.apple.nextmedia.com