智取大市：別人掃貨我倒數
■升市過後，永遠唔知下一浸係調整市，定係大跌市，所以沽貨觀望才為上策。 資料圖片
雖然港股星期三得嗰600億元成交，但氣勢比之前加強，隨時未來一兩日就會有更大成交出現，雞犬皆升之下，自然比星期三炒得更癲，等沽，一定好過追貨。
如果星期四朝早訓醒，見到美股升得
幾靚仔，開市時段搵貨狗衝，預備定一批近期跑輸同業、或近幾日冇乜點升嘅二三線股，見到一開市已經升1至2%，屆時相信仍有狗衝價值，之前講過嘅大落後酷派（2369）、以及整固似完成嘅信利（732），都有機爆上，不過，保守啲睇，任何短線機會都應該只視為一兩日貨仔而已。
撇除即日鮮嘅話，只要港股升幅擴大，9日RSI升到貼近80，就係沽貨時機。點解係都要減？唔睇定啲先？原因係升市過後，永遠唔知下一浸係調整市，定係大跌市，所以沽貨觀望才為上策。假如別人有信心時，自己無啦啦心雄起嚟，然後坐定粒六揸貨捱調整，萬一最後唔係調整，而係大跌市，隨時輸到入肉。
舊年港股大時代就係經典例子，5月大價股上上落落冇乜進展，資金轉炒細價股，而踏入6月初連細價股都升唔起，證明市況逆轉，就算係咁，當時包括小弟在內都唔會一口咬定升市已完，更加冇人敢講股災將至，個個都話係調整，但如果呢一刻唔走佬，之後6月尾先猛然發覺係一場股災突襲，就已經太遲。
晉佳
http://fb.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com