操盤手劄記：亂市炒高息防守股
■香港電訊息率是眾電訊股之中最吸引，投資者可考慮買入。 資料圖片
歐洲央行今日議息，估計會按兵不動；美國下周議息，亦應會繼續忍手唔加息，有「儲局線人」之稱嘅《華爾街日報》記者Jon Hilsenrath，昨日開始吹風最快9月先加息。
恒指連升6日、累
升6%後，前日回調0.6%，昨已回氣再上，並完全回補今年初嘅下跌裂口，昨升209點或1%，創今年新高；期指更轉炒高水。惟大市升勢未獲成交配合，連續3日唔夠600億元。換言之，升市只係期指挾倉，唔係資金掃貨；而且，大市已進入舊年第四季嘅蟹貨區，小心！
息魔放慢腳步，地產商鬥快散貨。中原地產研究報告顯示，上半年地產商賣樓成績，以銷售額計，新地（016）奪冠，恒地（012）居次，信置（083）第三，銷售額分別為188億元、91億元及63億元。過去一個月，賣樓三甲嘅股價已分別由低位抽升28%、16%及22%。
香港人有買樓情意結，睇《一屋老友記》三寶為買樓去到幾盡就知！買樓，係一場完美嘅謀殺，兇手唔知自己行兇，受害人唔知自己被害。以三寶為例，兇手係老婆、外母，日日嘮嘮叨叨要買豪宅；受害人係三寶，洗曬腦要買豪宅兼以此為榮。
買樓，除咗樓價風險，仲有樓按風險，包括利息、年期。過去10年，樓價不斷上升，按揭年期拖長，銀行做多咗30年按揭，今年上會30年，2046年到期，仍然喺50年不變嘅大限之內，當然無問題，但明年7月1日開始，做30年按揭就唔可能喺2047年7月1日前還清貸款，銀行又會唔會接受呢？地契又會唔會失效呢？
我有畏高症，無意高追地產股。喺全球有超過12萬億美元國債處於負利率，債息低過隨便一隻收息股嘅情況下，寧願揀防守型高息股，如本地電訊股，心水係香港電訊（6823），因其息率係電訊股中最吸引，比中電（002）、煤氣（003）、領展（823）更吸引。該股昨收12元，呈現區域上軌突破，預測市盈率21倍，預測息率4.7厘，諗得過。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com