中環在線：高軒庭半億買璈珀
■璈珀
幾時都話，樓市波動，對有錢人冇乜影響，甚至係畀機會佢哋入市。好似「低調殼王」高振順兒子高軒庭，新近就以超過5,000萬元，買入西半山豪宅璈珀一個過千呎單位。
高振順一向低調，佢嗰位37歲女兒高穎欣前年加入精電（710）做董事，大家先知佢個女幾靚女
，兒子高軒庭就因為曾有意投資於內地投資網站格隆匯而出名，呢個網站被形容為可以點石成金㗎，但高軒庭之後喺財經界都冇乜消息，比爸爸更低調。
富二代頻入市
不過原來佢開始投資物業，土地註冊處資料顯示，華置（127）旗下西半山豪宅璈珀9樓C室（實用面積1,588方呎），本月以5,152萬元成交，買家登記係高軒庭（Ko Hin Ting James），與高振順兒子姓名相同。
除咗高軒庭，近月亦有其他富二代入市買樓，好似幾個月前，九龍站有件勁蝕千萬貨，內地客以3,250萬元低價沽出天璽一夥，呎價約3.1萬元，買家正是太子珠寶鄧鉅明兒子鄧亦棋。最重要係，天璽最近有件皇鑽璽一手貨，以5,250萬元賣出，呎價上番4.7萬元，證明鄧公子執到平貨。
財經名人蕭若元兒子蕭定一，早排亦一擲過億買入西半山豪宅殷然頂層複式天池屋。香港地，都係富者越富㗎喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com