財金冒險號：買長實定長實樓?
■除咗名城「化妝樓」出事，長實旗下樓盤蝕讓個案都多啲，買唔買得過大家心中有數。
噚日《蘋果》報道，有人不慎買入大圍名城漏水「化妝樓」，搞到一肚氣。呢單嘢至少有兩個睇點。第一，名城由長實（1113）及港鐵（066）合作發展。如果各位有睇開樓市電視節目嘅
驗樓環節，應該知長實樓出名手工馬虎多甩漏，所以其新盤賣得零舍平，為求將價就貨也。
第二，上述單位賣家，喺2011年5月以877萬元一手買入，持貨5年微蝕7萬元，同期中原城市指數升34%。如此大幅跑輸大市、逆市輸錢嘅例子，喺其他發展商嘅樓盤都有，但長實特別多。
何文田半山壹號可算重災區，上月成交咗單1,970萬元，原業主2008年以2,192萬一手買入，捱8年蝕一成，同期大市勁升78%。大坑名門亦多蝕讓，V座A室2007年2,260萬一手買入，今年6月1,920萬沽，蝕15%，同期大市升77%。呢啲樓跑輸，固然同當年新盤溢價高有關，但如果將長實新盤與同區同期新盤比較，亦跑輸居多，例如2011年底將軍澳領凱，至今就跑輸新地（016）天晉。
點解長實樓特別多跑輸大市？第一，睇市準，擅於喺樓價回落前大手散貨。第二，「化妝」叻、包裝靚、銷售強，能將質地麻麻嘅樓以高於合理價賣個滿堂紅，業主收樓後漸漸發現問題，樓價就回歸現實。長實樓同長實股票，邊樣買得過，大家心中有數吧。
笑笑生
http://fb.com/sneeringman
本欄逢周四刊出
笑笑生
財金冒險號 - 笑笑生 舊文
來源 source: http://hk.apple.nextmedia.com