Can Bank：消失的Airbnb調停人
■網上消費平台十分就手，但售後服務不時引起不便。 互聯網圖片
消費者對網上平台售後服務不時都會有懷疑，在欠缺實體店之下，出事嘅時候，真係唔知搵邊個，即使個平台係世界知名嘅訂購平台。
散子之前去咗西班牙旅行，今次行程中，基本上所有科技
能幫手嘅都用上，就好似交通用上Uber，住宿用上Airbnb，行程就用Google Trip，出發前除咗book機票，火車之外，去旅行前可說是零準備。
既然係零準備，自然意料之外唔多唔少都會有啲，就好似今次到西班牙西維爾嘅住宿，散子由葡萄牙里斯本搭夜機到西班牙西維爾，到當地計埋時差要淩晨一點才抵步，搞到西維爾住宿嘅屋主向Airbnb查詢後，決定第一晚唔接待我哋，結果散子要另外book第一晚住宿。
不過亦都令到散子可以體驗到呢類網上平台售後服務。先回帶到搭飛機到西維爾之前兩晚，因為知道要淩晨才抵步，所以散子都提前通知屋主，結果如前所說，佢第一晚唔接待我哋（錢就要照畀），亦都因為抵步時間與屋主預期唔同，第二日屋主都唔知點可以畀到鎖匙我哋。
值得一讚嘅係，當Airbnb知道屋主第一日唔接待我哋嘅時候，都即刻主動以電郵聯絡我哋，散子同朋友因為真係太夜到埗嘅關係，都無要求回水，不過由於保安關係，就要求最好屋主本人或要搵個信得過嘅人畀鎖匙我哋，與此同時，散子亦都同屋主因為呢個問題爭持不下。
為咗呢個問題，散子同屋主爭持咗兩日，呢兩日屋主基本上將條匙應該交低畀邊個都講唔出，而Airbnb派出呢個調停人，頭兩日一直有同散子電郵聯絡，直到出發到西維爾嘅一日，呢個調停人竟然成日唔見咗！個電郵本身無留電話不在話下，就連去Airbnb訊息查詢，佢地個Chatbot都以已立案為由，拒絕進一步協助。
好彩係最後屋主的確搵咗個信得過嘅人交低鎖匙，而呢個Airbnb嘅調停人，就直到第三日先出現，解釋竟然係，佢個人有啲事所以早前無辦法跟進（藉口衰過淘寶啲賣家）。雖然佢有道歉，但從散子角度，再用嘅信心一定差一大截。
散子
本欄逢周二刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
散子
Can Bank - 散子 舊文
來源 source: http://hk.apple.nextmedia.com