其士賣產變沉香
2017年06月20日
內地A股入摩得定唔得，今個星期就會有聲氣，大市昨日升近300點就炒吓呢個消息，暫時中資股表現一般，升市主力係騰訊(700) 同友邦(1299) ，反映大家都唔敢放盡煲A股入到摩。
沉澱項目變現賺番筆
大市彈得勁，但資金唔係咁癲，本地
股升得多嘅都係有啲資產嘅公司。中環茶友 笑騎騎講起，最近佢有隻倉底股突然發力，創左新高，茶友收息多年，而家財息兼收。
茶友講嘅股份係上左市好多年，但作風好低調嘅其士(025) ，呢排佢有兩個消息，一個係賣左內地一個項目；一個係投到市建局重建計劃。但呢啲咁低調嘅公司，根本無乜報道。
茶友身為股東，睇番年報佢賣出嘅項目，係向在深圳上市的陽光城(671) 出成都物業及地皮的公司，代價淨額約17.73億港元。呢個叫做成都半山艾馬仕開發項目，第一期已於2013年竣工及開售。於協議日期，項目第二期開發及第二幅地皮之建設工程尚未開展。目前半山艾馬仕第一期開發項目下有47間別墅、51間公寓單位及318個停車位單元仍未出售。出售呢個項目估計將錄得收益約5億元，有啲爛柴變沉香嘅味道。
茶友留意到過去公司管理層曾經形容，內地房地產發展商推行的去庫存政策對集團內地物業業務造成巨大壓力，成都「半山艾馬仕」之銷售未如理想。經過內房一輪消化，現時一舉出售呢個沉澱多年嘅項目，唔單止可以套現，仲賺左成五億元，單係呢筆數已等如公司全年盈利。
其士上市多年，公司有好多資產，係中港物業有價下，佢嘅家底相當可觀，所以股價近排就飆左上嚟，昨日一度衝破14元，最後升3%，收報13.82元。呢啲本地二、三線公司，就係我昨日所講，本身唔止要有可以套現資產，更關鍵係大股東有意欲出售，而且大股東過去都幾豪爽，有錢賺會派吓特別息，呢啲公司消息唔多，高追會有風險，最好就係平時自己畀心機發掘吓喇。
類似呢啲有家底公司繼續炒吓資產，創出近一年新高，包括四叔嘅美麗華(071) ，仲有大酒店(045) ……等。
大市方面，市場憧憬A股將於本周獲納入MSCI指數，帶動港股周一高開109點，報25736，其後持續攀升，最多升313點，高見25939，可惜成交未能配合，恒指收報25924，升298點；國企指數收報10520，漲135點，大市成交金額只有657億元。 兩隻大股騰訊同友邦合共拉動恒指103點升幅，騰訊升2.27%報278.8元；友邦升2.06%報收57.05元；同樣被視乎A股入摩受惠股的建行(939) 升1.1%報6.46元；工行(1398) 升0.77%報5.23元；滙控(005) 亦漲0.81%報68.9元，獲中金唱好的恒安(1044) 更升4.8%報57.9元，成表現最佳藍籌股。
證券股借入摩炒作
港交所因推新板及有望受惠於A股入摩而獲多間大行唱好，周一股價升2.7%報203元，為恒指貢獻20點升幅，券商股亦有望受惠於本港推出新板及A股納入MSCI，券商股周一普遍向好，第一上海(227) 漲5.6%報1.13元；海通國際(665) 升5%報4.65元；國泰君安(1788) 升4.2%報2.47元；申萬宏源(218) 升4%報3.11元；耀才(1428) 升3.9%報2.42元；中信建投(6066) 升3.5%報6.75元。
陸羽仁
金融High Tea 舊文
來源 source: http://hdfin.stheadline.com