大棋局：2018新貨幣秩序（六）
■美元要繼續做莊，大美元台戲必須唱落去。 資料圖片
聯儲局縮減資產負債表嘅真正含意，係要維持美元霸權。自聯儲局實施QE後，美國國家債務佔GDP比例躍升至全球第十位。如果係津巴布韋或委內瑞拉，其貨幣一早變廁紙。但美元自2014年末強
勢獨步天下，點解欠債越多滙率越強？因美元滙價包含加息及縮表預期。
聯儲局縮表威力有幾大，看幾組簡單數據。2008年金融海嘯前，聯儲局資產負債表規模約9,000億（美元，下同），截至今年5月，增至4.5萬億。伯南克及聯儲局委員各自計數，認為應收縮到2萬億至3.6萬億，即要縮減20至55%規模。講係咁講，最後係咪縮咁多唔知道。但聯儲局只要繼續咁講，美元就不可能弱。此為聯儲局縮表嘅程度。
耶倫計劃起初每月縮表100億，每季再加碼，直至每月縮表500億。即係話縮表開始第一年，估計拉勻每月約縮減300億，一年後每月縮減500億。故整個縮表過程視乎程度，最少要二至四年半。由2018年至2022年，市場上嘅錢只會越來越少，唔會越來越多。此為聯儲局縮表嘅時間。
資產價格係貨幣現象，美國QE幾年為求晾住當日爆煲嘅資產價格。今日要來刺破自己晾住嘅價，不可能。所以美國一旦縮表，就會配合美元萬劍歸宗。只要將美元萬劍歸宗理解為一種對沖便容易明白，收水過程中貨幣緊縮，但有外水湧入，就會抵銷美國本土通縮壓力。吾人兩年前書《2016大美元時代》時並不知道特朗普會當選，惟邊個做總統唔重要，大方向上美國需要咁做嚟維持其大莊家地位。
將來出現嘅貨幣秩序有五個可能：美元繼續做莊、SDR成為主導、數字貨幣搶灘、金本位皇者回歸，又或，上述四者混合而成。美元要繼續做莊，大美元台戲必須唱落去。因為美元只要示弱，其他人就會一擁而上。
（待續）
Mr. Tregunter
本欄逢周二刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
Mr. Tregunter
大棋局 - Mr. Tregunter 舊文
來源 source: http://hk.apple.nextmedia.com