操盤手劄記：智能車更具潛力
■內地嘅智能車有科網巨頭加持，比新能源車更具潛力。 互聯網圖片
特朗普喺聯合國大會演說，警告北韓咪再玩火。不過，金正恩唔多理聯合國，投資者亦唔多理金正恩，注意力重回經濟增長面。事實上，股市今輪升浪，係有美國、歐洲、中國經濟回暖支持。全球放水十年，經濟開
始復蘇，各國開始收水，但步伐緩慢，本周焦點正係美國縮表時間表。
美國聯儲局議息結果揭盅前夕，環球股市無窒「息」，MSCI世界指數破頂；美股道指連升8日兼連續6日破頂；港股承接外圍造好，，逐步向大時代高位28588進發，市場似乎已消化美國縮表等因素。
資金繼續炒股唔炒市，主題股輪流炒上，又輪到汽車股。內地打算制定停售燃油車時間表，上周新能源車炒咗一轉，本周唞一唞又嚟過，龍頭比亞迪（1211）得到摩通祝福，單日再飆13%破頂。除咗新能源車，其實市場呢兩日亦炒緊智能車。
廣汽（2238）同騰訊（700）日前簽訂協議，喺車聯網、智能駕駛、雲平台、大數據、汽車生態圈、智能網聯汽車營銷同宣傳等領域合作。消息一出，廣汽連續兩日破頂，累升7%，收18.56元。走勢呈現多重利好訊號，包括三重底、區域突破、三角突破，不妨留意下。
所謂智能車，係指配備傳感器（雷達、攝像）、控制器（路徑規劃、決策）、執行器（轉向系統、驅動系統）等裝置，融合網絡技術，透過智能化，逐步達至駕駛半自動化，最終全自動化嘅汽車。人工智能（AI）係大趨勢，全球多家科網巨企，包括蘋果、Google等，都已投入研發智能車。
中國嘅BAT──百度（Baidu）、阿里巴巴（Alibaba）、騰訊（Tencent）亦落疊。百度喺無人駕駛領域走得最前，已開發Apollo自動駕駛系統，今年4月又同奇瑞合作研發智能車；阿里亦喺前年同上汽（滬：600104）合作，上汽舊年已推出首架智能車RX5；依家又有騰訊同廣汽合作。智能車有科網巨頭加持，比新能源車更具潛力。
割柑人
本欄逢周四刊出
割柑人
操盤手札記 - 割柑人 舊文
來源 source: http://hk.apple.nextmedia.com