甘比概念
2017年09月21日
港股等緊美國議息，大市相對平靜，美國聯儲局管理功夫到家，事前張揚晒呢兩個月應該唔加息，等到年尾就有機會郁手，反而就會有序咁啟動縮表。
聯儲局等緊縮表開動，市場估計會對經濟有溫和壓抑作用，但整體影響唔大，分析家估計有幾準呃唔到十年、八年，但一年半載
一定得，反正市場喺央行指揮下，表現相對鎮定，全球股市喺收水前繼續喺高位徘徊。
劉氏家族大手認購佳兆業債券
大市喺周四央行公佈議息結果前偏穩，繼續喺大時代後高位徘徊，內房股繼續熱鬧。呢排勁升嘅恒大(3333) ，噚日繼續創新高報29.05元，再升3.4%。恒大同內房近日猛升，大贏家之一係華置同佢嘅大股東劉鑾雄家族。有金融界消息同中環茶友爆料，話劉氏家族呢排動作頻頻，繼買入恒大後，又連同幾位投資好友大手認購佳兆業美元債券，佢哋相信呢個多元投資組合，既能平衡風險又有強勁回報。
據金融界消息向茶友透露，劉氏家族早幾個月已經認購咗六億美元佳兆業債券，後來再添食六億美元債券，一共持有超過12億美元佳兆業債券，劉氏家族佔當中超過九成，預計每年可袋超過8.7億港元債息。
消息仲話，呢個投資係甘比經手，佢經過大劉多年薰陶後，四月份初試啼聲購買恒大美元債券已見佳績，其後一直密切留意市場動態，除咗自己細心分析同深入研究，亦同集團專業投資團隊溝通，參考專業投資報告等，以評估各投資產品嘅發展潛力同回報。
買咗債券，外界自然想知佢哋有冇買佳兆業股票，消息話劉氏家族與華置投資團隊一直睇好內房嘅發展潛力，劉氏家族私人或華置名下除咗恒大及佳兆業，分別持有其他六至七間內房公司嘅投資產品，包括債券同埋股票。佢仲好神秘咁話，其中一間佢哋買嘅內房公司市值最近喺短期內由500億飆升至超過1500億元，加上依家持有高達十幾間海外銀行嘅債券，投資組合非常分散。
除咗金融投資，劉氏家族同華置投資團隊亦一直積極研究同參與地產投資發展，平衡各業務嘅風險同彈性，例如華置喺過去一年幾，已經收購嘅三項英國物業都位處甲級地段，出租率達100%，至今華置喺英國一共擁有四個項目，為集團每年帶嚟約3.5億港元嘅租金收入，平均回報近四厘。
消息人士話大劉都幾讚賞甘比，話佢投資成績唔錯，足以證明已經把握投資要訣。劉氏家族同華置投資團隊深明良好嘅資產配置就可以承受唔同程度嘅風險，於是喺投資組合加入不同市場、種類同年期嘅投資產品，加上把握各類型投資良機，只要有好回報都會考慮，正所謂「邊度有錢搵，就投資邊度」。
比亞迪急升完再急升
中環茶友聽完金融界消息人士爆完大戶動向，話唔怪得之最近內房會有咁嘅表現啦。睇番佳兆業股價，佢月初由四元起步，噚日收報5.23元，跌咗2.8%，但累計就升咗差唔多三成。
恒大噚日再上，反而呢排炒得好勁嘅融創中國(1918) 倒跌2.8%，收36.55元。恒指就收報28127，升咗76點；國企指數收報11173，升47點，成交970億元。大價股最搶眼係比亞迪(1211) ，股價大升12.7%，收報68.9元；吉利汽車(175) 都升5.7%，收報24元。比亞迪乘住內地加快推進電能車普及化個勢，股價升完再升，一個星期由唔夠50元爆上噚日最高71.95元，成為另一隻大型概念股。
新股呢排升溫，超購千倍嘅童園國際(3830) 今日喺主板掛牌，上市前夕喺暗盤市場高收0.65元，升35%，每手5000股唔計手續費，一手賺850元。另外，中航工業(232) 獲母公司注資，股價周三急漲80.82%，報0.66元。
陸羽仁
金融High Tea 舊文
來源 source: http://hdfin.stheadline.com