異動空間：佛系蟹民方程式
■佛系投資者的信念：不聞、不問、不沽，緣份到了，自然返家鄉。 互聯網圖片
近日忙於為書展推出的著作趕稿，加上市況飄忽，唔炒好過炒，不如抽離一點，談談倉位操作。今年主持一個網台節目，環節之一是為散戶的股票倉把脈，個案（苦主）是新手為主，倉位多介乎10萬至30萬
元，「死因」最常見是買細價股/創板股短炒變長揸，輸五、六成都無止蝕；有賺的就執幾格或幾巴仙就食糊，結果玩咗一年半載，就成手都係蟹，慢慢就變成「佛系投資者」：不聞、不問、不沽，甚至delete埋個報價app，以為唔睇就可以返家鄉。
對於這類典型慘敗個案，可以做的其實很有限，因為輸10%、15%唔投降，到輸一半時，就算講明要斬，苦主多數都是意見接受，態度照舊；更甚者是呢頭話無得等、要掟出街，佢轉頭就問「可否低溝一注，等易啲返家鄉？」唔止蝕，原因是怕輸；但怕輸，換來的是輸更多。
另一通病是「花心」，10幾萬的倉，買到8隻股票，由長線收息股、中線增長股，以至毫股、仙股、妖股、輪證統統都有，不少更是在職人士，無法經常望報價，睇都睇唔切，如何及時操作？結果坐艇就由佢先，同自己講句「啲錢唔等使，擺住先吧」安慰一番，過多一排，又一位佛系蟹民誕生了。市場機會無限，但人的精力有限，記得莊子《庖丁解牛》有雲：以有涯隨無涯，殆已。共勉之。
魏力
http://fb.com/2012jason
本欄逢周一、五刊出
魏力
異動空間 - 魏力 舊文
來源 source: http://hk.finance.appledaily.com