智取大市：恐懼寧少做少錯
■現階段並非身處大牛市氣氛，投資者毋須急住見高追，想買強勢股，等回吐時吸納更好。資料圖片
美股道指周三上試100天線不果，但係標普500指數啱啱收復100天線，只爭在企唔企得穩，內地A股亦剛剛觸底反彈，股市走勢似乎未至於新聞消息面咁世界末日。怕追貨隨時中伏？
怕坐貨會大跌形成龐大心理壓力？如果怕嘅話，的確，少做、少錯、少坐為上，以防一震倉又低位被震走，好無謂。
如果閣下同小弟一樣，中短線唔太怕嘅話，不妨儲定值得中線Buy and hold嘅機會。現階段並非身處大牛市氣氛，因此毋須急住見高追，想買強勢股，等回吐時吸納更好，之前跌得少、𠵱家升得快嘅股較佳。
受惠通脹概念之中，除咗消費股之外，資源商品股、內房股都可以納入通脹概念行列，雖然資源商品股噚日急彈，不過幾乎免疫於貿易戰嘅內房反而更秤先，合景（1813）值得考慮。
資源商品股之中，中鋁（2600）急彈主要受惠俄鋁（486）制裁令鋁價急升，但股價明顯跑輸LME鋁價同美國鋁業，似乎非十分好的選擇。兗煤（1171）爆升，煤炭更遠離貿易戰風眼，但股價可以由最高15蚊跌到低過9蚊，當然有其缺點，秦皇島5500大卡動力煤嘅每噸價格由1月底750人民幣，跌到最近564人民幣，股價對於煤價下跌有所反映，高beta繼續跟市走，說差又未必太差。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com