金融High Tea 2018年4月20日
阿爺發功 股市反彈
2018年04月20日
恒指經歷四連跌後，終於反彈。呢次反彈似乎係由阿爺帶動，先前人行突然降低存款準備金率，實行放水；跟住又傳出國家隊入市買股。A股呢排積弱，上證綜指一度跌近3000點，估計阿爺對此都會好關注，所以有連串消息走出嚟，連港股都受帶動回升。
滬指3000關不想丟失
中美近日喺貿易問題上連番互動，形勢經過一輪發展開始清晰，美國與內地唔止係貿易之爭咁簡單，背後仲有經濟霸權之爭。美國喺高新科技領域係全球龍頭，無論係網絡經濟、人工智能、無人駕駛等都大力推進，中國就喺呢啲範圍擺出要全面同美國競爭姿勢。O依家美國借住貿赤出招，火頭就點到去科技領域，咁成個玩法又唔同了。
兩大經濟體爭先，戰線唔止喺貿易層面或者關稅，因為貿易衝擊同關稅影響太慢，效果唔顯著，更加直接係股市。如果股市大跌，對公眾心理影響大好多，隨時喺金融市場造成漣漪效應，政府所受壓力即刻增加。
特朗普宣佈對中國制裁後，中國向美國的反制措施主要打擊他的選民，同內地做生意的公司好似波音股價都受壓，但整體而言，美股無乜點跌過，呢樣嘢亦令特朗普可以繼續出招。
同美股相比，內地A股今年表現麻麻，上證綜指由年初接近3400點碌吓碌下，幾乎跌到去3000點邊，差不多唔見咗一成，若然股市跌穿呢個心理關口，形成熊市氣氛，就會可能出現負財富效應，咁對內地同美國持續抗衡會有不利效果，所以周初人行宣佈降準，都有扶持股市味道。
喺中央放水下，A股連彈兩日，滬指一度見3127點，升幅近1.2%，尾段由高位回順。上證指數收報3117點，升25點，深成指數收報10598點，上揚107點，深圳創業板指數收報1820點，跌1點。
不過，內地股市氣氛暫時未見明顯熱度，中央要頂住個市，可能仲要繼續發吓功。港股亦隨內地股市造好，恒指收報30708點，升424點；國企指數收報12239點，漲253點，成交1149億元。
今年指數上上落落，好多股份都係升完又跌，跌完又升番吓，喺區間上落，石油板塊係少數能夠維持向上走勢板塊。三桶油再度奏捷，中石油(857) 急升5.7%，收報5.94元；中海油(883) 急漲4.4%，收報13.24元；中石化(386) 升2.7%，收7.7元，幾隻股價輪流創一年新高。石油股造好，主要係跟住外圍炒，前晚紐約油價上升2.9%至68.47美元的3年以來新高，標普500指數能源板塊升1.6%。
推郁油價的好消息係美國能源資訊署公佈，最近一周美國商業原油庫存下降110萬桶，汽油庫存下降300萬桶。另外，美俄喺中東關係緊張，加上原油最大存量的委內瑞拉出現經濟危機，產量愈來愈少，對油價起了很大支撐作用。
俄國世盃前油股熱炒
油價接連出現好消息，不過呢啲因素唔多唔少都係人為，好似美歐聯手轟炸敍利亞，搞到同俄羅斯關係緊張，表面好似係估佢唔到。但自特朗普上場，陸羽仁已經話油價好長遠的需求，會因為能源消費模式改變下降，但中短期必然走番共和黨上台一貫弱美元、高油價舊路，皆因油商係共和黨金主，佢哋執政必然搞到中東大亂，催谷油價。美國O依家唔使等毒氣調查報告，就炸俄羅斯馬仔敍利亞，攞明向普京挑機。可以預計普京若再有行動，華盛頓必然上下一心加強打擊，實行搞亂全球能源供應。俄羅斯世界盃好快就舉行，美國佬通常趁呢啲日子玩嘢。國際政治形勢瞬息萬變，但對有內線的炒油大戶而言，真係炮聲一響、黃金萬兩。
有軍火商撐腰的共和黨唔怕天下大亂，俄羅斯同中國就成為撩交打對象。中俄因此變成難兄難弟，有禍齊齊當。俄國最大企業之一的俄鋁(486) 就快被美國佬趕絕，股價周初再大插。有外電引述消息稱，俄羅斯鋁業官員本周會晤中國貿易商，雙方正商討將俄羅斯生產鋁製產品銷往亞太區國家可能性，現仍未達成協議，中方對此交易持非常謹慎態度。俄鋁午後走高，收升26%，報1.79元，由於俄鋁喺國際市場無得玩，令國際鋁價造好，中國鋁業(2666) 連日攀升，昨日再升7.8%，報5.15元。內地同俄鋁買嘢，隨時成為美國加強貿戰火力藉口，必須非常小心，所以炒俄鋁風高浪急，回報與風險同樣高，至於中鋁間接得益，無咁刺激但都係另一個發政治財選擇。
陸羽仁
金融High Tea 舊文
來源 source: http://hdfin.stheadline.com