【實力取勝】滙控返嚟啦！（陳承龍）（第173期）
2018-4-19 18:24:37
嗱！終於狼來了。港元拆息利率抽升，令有大量港元存款嘅滙豐，拆借出市場嘅利率上升，滙控（00005.HK）股價喺74至75蚊打咗好好嘅底，加上管理層話股票回購計劃同股息維持不變，預計喺8月中期
業績會公布大回購計劃，估計規模達25億美元，但因2018年得返五個月（8月至12月期間買），所以對股價刺激會好大，每日都會買好多，呢幾日，已經有春江鴨密密掃。
另外，海南島如果批准跑馬同賭波，應該對澳門冇影響。有啲友仔會用呢個消息唱淡濠賭股，因為佢哋俾人夾緊淡倉。香港有得賭馬咁多年，但仲係禁止開賭場，原因係兩者分別好大。
1. 賽馬根本係體育，成吉思汗同古羅馬時代已經有跑馬，嗰時啲人都會落賭注去賭邊隻馬跑第一。
2. 跑馬可能每星期一、兩次，但賭場係24小時，一年365日都有得賭。
3. 跑馬唔會賭得大，因為有賠率，所以你會買三千，甚至一萬或十萬，去博十倍或以上嘅獎金。好小人會用一千萬去賭一場馬，但賭場一日輸幾百或幾千萬嘅人，通街都係。
4. 馬場通常係政府或半政府機構經營，抽咗稅用嚟做善事後，其餘嘅錢先用嚟派彩。
5. 賭場就係減咗賭稅後，輸咗嘅錢就歸賭場經營者。
6. 賭場通常會令社會產生好多問題，如大耳窿集團同負責追數嘅「大哥」，窮奢極侈嘅飲飲食食、輸錢輸到妻離子散、黃色事業等等。
共產黨係禁賭嘅，習近平主席啱啱將佢的思想同理念寫入共產黨黨章，小弟唔信佢會容許開賭，繼而令到14億中國人跌落呢個腐化深淵。
其實喺通告入面，只係話「鼓勵發展沙灘運動、水上運動、賽馬運動等項目，支持打造國家體育旅遊示範區」，就算中央有一日由跑馬彩票改為全面可以開賭場，可能都係兩年後嘅事，跟住立法、招標，又要兩年，拍賣用地、建築又加四年，即係八年後先可以同澳門競爭。但係如果中央真係兩年後立例可以去賭場賭錢，即是中央唔再禁賭，咁去澳門賭嘅中國人就會肆無忌憚咁由依家嘅每年2000萬人次，慢慢上升6000萬人次（因為中國人太鍾意賭錢），所以濠賭股盈利有機會升幾倍。到海南島賭場開業時，就根本唔會對澳門有影響，因為到時中國嘅賭民已經去到可能總人口嘅10%，即係1億4000萬人，澳門同海南島嘅賭場到時啲生意都會做切。
實力取勝 - 陳承龍 舊文
來源 source: http://www.winmoney.hk