經濟客艙：貿易戰多面睇
■早前美股冧市下，日圓未有受惠避險需求推動，意味其避險角色褪色。資料圖片
貿易戰個個都關心，帶出嘅問題如遠若近，其實對各界都有不同影響。上星期提到若內地13億人反美情緒集結成形，衝擊美國公司業務嘅影響力難以預測。以去年反韓浪潮為例，令內地韓
國企業「即時休克」，甚至敗走中國。事實上，呢個論點好快被反駁，呢種非關稅措施喺內地推行難實行，中國人係最不信任國產貨，亦係最不能抵制外國貨嘅消費者。相反，美國消費者先係貿易戰嘅問題。
官方喉舌《人民日報》日前發表評論文章，中美兩國存在巨額貿易逆差，並非中國過失，而是美國民眾儲蓄不足的必然結果。如果美國不提高民眾儲蓄，無論對外發起幾多次貿易戰，都無法消除貿易逆差。中方反駁理據充份，或者中方收集資訊回應時，又咁啱睇到聖路易斯聯儲銀行今年5月發表嘅《經濟概要》，內文指美國與中國貿易戰無法阻止美國製造行業職位縮減，或降低美國貿易赤字，但美國消費者將會最受影響，因為美國進口貨品加價。
美國人習慣碌卡消費，一方面薪酬增長緩慢，用信用卡繳付日常開支。美國經常出現貿易失衡，儲蓄為投資和淨出口總和。如果淨出口為負值，代表儲蓄低，國內投資活動亦受累。簡單而言，高儲蓄嘅國家，常常出現貿易盈餘；低儲蓄國家則經常出現貿易赤字。可以留意返，美國儲蓄同投資早於上世紀70年代開始逐步擴闊，去年累計增至11萬億美元。美國歷年以來，享盡美元霸權之利，消耗相對出產更多，其中一個原因就係靠絕招「印銀紙」。呢度又牽涉美元同國際貿易嘅關係，詳情下星期再探討。
Captain Cool
FB page：http://fb.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com