【大茶飯】巴菲特用人不疑（青冰）
剛在周末舉行的巴群股東會，全球注視，股神巴菲特及老拍檔芒格年事已高，主持股東會應該係睇一次少一次，繼任人是誰現時睇都相當明顯，巴菲特在股東會內幾次盛讚Ajit Jain及Greg Abel，話兩位遠比佢哋兩老聰明，不過即使繼任人幾醒都好，魅力嘅嘢始終冇得傳
承，就好似香港的誠哥及四叔，退休不一定對集團好大影響，但出嚟講說話，夠唔夠份量，市場是否受落，真係呃唔到人。
巴群披露買入亞馬遜，當然嚇市場一跳，因為一直信奉價值投資的巴群，甚少會沾手如此高估值的股票，巴菲特就開口撐，話決定買貨的人，比佢更信價值投資，亦很了解亞馬遜每一個範疇的業務。
究竟高位買貨是否明智，相信要幾個季度後才有結果，但給青冰的印象是，股神的確是用人不疑，疑人不用，整個股東會，佢同芒格兩老，都不止一次話唔太了解某個範疇，例如5G，不過言談間就很信任操盤人。這跟我們聽誠哥的股東會有不同，基本上記者問乜，誠哥都會用心答，亦見到佢對集團大小事務，也是瞭若指掌，現在雖然退下來，但李澤鉅說在重要決策時，仍會跟爸爸商量。就咁睇，似乎巴群失去兩老的影響，應較長和系無咗誠哥細，因為唔少投資的決定，已經由繼任人揸fit，兩老已經變了精神領袖。
芒格有提及買入中國股票，並聲言會買更多，但較有趣的是，青冰看過幾個外國傳媒，都沒放在重點當中，有提及的，亦只是一句，而內地傳媒就當然大字標題喇，究竟內地有咩具質素的股票，值得巴群買更多呢，你可能會話，嘩內地好質素的公司，估值極貴，咁咪有違價值投資囉，但又要諗返，亞馬遜都唔嫌貴，似乎新的掌舵人，看估值並不是坊間著重的市盈率市賬率，而是業務本身獨特性及壟斷性潛力吧，咁啱內地將放寬外資對內銀內險的持股上限，巴群會否買返隻玩嚇呢？
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com