睇恒指月線圖，將08金融海嘯低位，同埋2016年2月熔斷股災低位，加埋周五低位，形成一條上升支持線，呢3點係恒指市賬率1
倍水平。港股呢3次市賬率跌到1倍，都係由流動性危機逼出嚟，如果流動性危機解決，正常恒指會返去25000點至3萬點嘅range，即係之前市賬率1.1倍至1.3倍，計埋業績期後賬面值roll over因素，流動性正常日子嘅恒指range理應推高到26000點至31000點。
講緊上次市賬率接近1.3倍係年頭嘅事，要日後見返1.3倍，反映嘅係冇曬武漢肺炎同埋冇曬流動性危機嘅某個興奮日子，升凸就係超買。
流動性危機令港股突然偏離應有估值range，吸引資金大手撈底。周五V彈成交逾2,000億，要再推低個市，就要有更大力度嘅沽盤。周日杜拜跌3%，合理反映周五全世界市況，偏弱但未至失控，現時睇周一環球股市似買大細，但冇失控之下，港股應未至周一直插去上周五低位，如果流動性危機紓緩到，先真係有機會挾淡倉。
之前預計港股上周先跌後升，最終「後升」只出現半個交易日，只能承認估錯曬，好彩嘅係，個股跌勢唔算慘烈。而美股以期貨計，高位至低位跌幅三成，相比87股災都係最多跌36%，以今時今日美股市場深度計，今次都夠誇啦啩。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com