之前，寫過點解政府入口罩入得咁慢，兼且困難重重，皆因要走流程、要投標
、要比貨、仲要比價……當全世界都搶口罩，政府仲要多多要求，真係搵鬼睬你咩。
香港由冇口罩、搶口罩、炒口罩、演變到現時滿街都係口罩，只不過價錢仍然貴一點。時至今日，原來仲有好多商營機構及NGO要日日撲口罩，點解？同政府一樣，由於NGO的營運資金大部份都係來自政府資助及慈善捐獻，採購部門同樣要走流程同出標書。
相信有好多人都發覺，日日戴住口罩會帶來不少麻煩，例如iPhone及有些智能手機的人面辨識功能變得得物無所用。聽講最近，騰訊（700）旗下AI平台「騰訊優圖」推出咗「口罩人面辨別」功能，就算唔除口罩，都能夠超過99%準確辨識身份。
當人人都戴住口罩，對於女士們，化妝品及唇膏，應該都用少咗好多。Work from home，最好唔使視像，齋聲音會議就慳返唔使化妝吹頭。就算返工，戴住口罩，都可以keep住唔使化妝，或者最多都係局部化。對於好多男士們，呢期更加不修邊幅，唔使成日剃鬚，剃鬚用品使用也自然大幅減少。我見到有些同事，之前一向都係官仔骨骨、好似韓星咁青靚白淨，呢期一除低口罩，全部都變咗滿面鬍鬚，就像電影《劫後重生》裏面的湯漢斯一模一樣。
猶記得2003年沙士，化妝品牌Red Earth面對唇膏銷量急劇下滑，做咗個"Still Smiling"（依然保持笑容）的廣告推廣，鼓勵女士們多化眼妝，增加好心情，即使每天戴口罩，也希望口罩下的你，保持微笑，積極面對抗疫生活。抗疫，除了口罩及搓手液，一個良好積極的心境，同樣重要。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com