由舊年8月反彈浪到現時，港股每逢出現500點左右或以上嘅單日單邊升市之後，就進入慢升、炒股不炒市階段，相信全面升市有可
能已完結。而以過往趨勢睇，呢段炒股不炒市時間至少有一星期，越能夠延續，後市興奮度會越高。睇返12月至1月嘅反彈浪，單日大升市過後，足足有22個交易日嘅反覆上漲趨勢，升浪先至真正收皮，而呢段時間，指數冇大升，但中後段炒風相當熾熱。
今次能唔能夠重複，其中一個重要因素係美國總統民主黨初選，係拜登定係桑德斯成為特朗普對手，絕對影響特朗普喺大選前嘅對華取態。
喺啱啱過去嘅「超級星期二」，1,357張選舉人票之中，拜登上演大逆轉，輕微領先桑德斯。嚟緊3月10日同17日嘅初選結果後，已有超過六成選舉人票揭盅，雖然大家可能喺3月10日之前聽到沃倫退選，避免𠝹走桑德斯嘅票，但3月份嘅州分初選偏向對於拜登有利，只要唔好再失言，就係拋離桑德斯嘅好機會。就算桑德斯同拜登去到4月28日關鍵初選日子仍然鬥到直路，特朗普相信唔會亂咁對華出招，令市場面對政治風險下降，中資股嘅風險胃納會上升，買乜？ATM、內房、物管、券商、水泥股睇怕會繼續輪流炒。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com