大疫當前，港府兩個月內兩度推出抗疫紓困措施，第一輪動用300億元，第二輪動用1,375億元，連同2月
尾財政預算案嘅1,200億元逆周期措施，包括每人派1萬元，至今合共動用2,875億元抗疫，佔本地生產總值一成，比率同美國、新加坡相若。
特首林鄭抗疫一直慢幾拍，今趟加碼1,375億元，當中800億元保就業計劃又漏洞百出，包括難阻僱主減薪、放無薪假等，勞工及福利局局長羅致光竟然回應：「難以做到滴水不漏」。一個年年考第一嘅特首、一個IQ 160嘅局長，得個「廢」字！
措施惹嚟「益僱主多過僱員」、「無差別資助公司」嘅非議。獨立股評人David Webb就質疑港府係由一班「經濟文盲（economically illiterate）」領導，又指公司有授信責任，為咗股東利益，無論受累定受惠疫情，無理由唔食呢個免費午餐。
受累疫情嘅行業，例如旅遊、餐飲，港府補貼出糧，幫到手吊命；至於受惠疫情嘅行業，Webb點名連鎖超市同便利店，指疫情之下生意更好，仍可攞著數。以每個僱員半年補貼最多5.4萬元計，1,000人就5,400萬元，對公司盈利好重要。
零售業本受疫情重創，但「居家抗疫」有利超市同便利店。港股之中，相關股份包括OK便利店母公司利亞零售（831）、日本城母公司國際家居零售（1373）；兩者之中，OK便利店同店銷售增幅為6.1%，高過日本城嘅3.3%，可睇高一線。
利亞舊年賺2.1億元，增13.3%；現金增至6.4億元，無銀行借貸；派末期息0.19元，特別息0.21元。便利店業務佔總收入八成，相關營業額增7.5%，比前年嘅3.6%躍升，未受社會運動影響。該股現價3.78元，股息率12.2厘，具抗跌力。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com