噚日孫柏文睇到個笑話，有個外國財演分享話佢個11歲大嘅仔問：「如果隕石撞地球，聯儲局會印多幾萬億呢？」你識笑，都應該係苦笑，而唔
知點解要笑的話，我解釋。
自由市場要work，一定要啲企業頂唔順時，能夠執笠。如果唔係，所有佢哋霸住嘅資源，就繼續無效率咁run。所以當你救呢啲公司，佢哋就坐得更穩，更加唔怕做啲無效率嘅嘢，更令啲後生仔女冇得上位。
今轉聯儲局要出手咁重，喺短短一個月，已印咗救金融海嘯08年後，咁多輪QE一半錢嘅原因，就係喺08年前，你越係亂借，就越有人救，你越係保守，就眼白白睇住啲借咗好多錢亂嚟嘅人發達，自己冇份。咁會點？當然就要一齊亂來啦。
今轉，有幾多間公司要政府出手救？原因係佢哋個個借大量嘅錢去做股份回購，因為睇死你一定印鈔去救佢。08年，你印完去救，都起碼會入股啲公司，國有化嚇。呢轉，波音公司話到明錢照攞，不過一股都唔會畀政府。
你話，咁點救呀？你估啲官真係夠膽唔救咩？好多人話，再唔淘汰啲無能嘅公司話事人，平民百姓會造反，政府步向共產主義。我話你都傻嘅，全地球都係啲權貴話事，一冇事，就會話政府幹預唔好㗎啦。大家，接受永遠冇得上位吧。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com