「政策原意係……」每次聽到政府官僚一開口講呢幾個字，我知道，一定有人做錯事。
「原意」就係「主觀願望」。一個法治社會，講求明確客觀嘅
規則。當你設計政策嘅時候，發現有啲嘢點都唔可以白紙黑字去定義，又或者發覺寫咗都無方法去執行，又或者執行嘅代價大過成效，你就知道政策設計有根本嘅問題。
政府話派錢幫企業出糧，好多人即時諗到好多唔同嘅「漏洞」；但最多人問嘅問題係：「原則上，筆錢係畀僱主定畀員工？」如果係畀打工仔，不如直接由政府分配！再講，有工開嘅有津貼，冇工開嘅反而冇，係唔係有少少反智？
究竟政策嘅原意係乜？係唔好炒人？呢個思想咪反映政府班高官嘅價值囉。企業點解要炒人？因為冇生意。冇生意，你吊佢命，成班人返工冇嘢做，呢啲「殭屍公司」對社會有乜意義？點解啲官會覺得 「殭屍公司」冇問題？因，為，呢，個，就，係，班，官，嘅，生，活，日，常。
我再講多次：「班官嘅生活日常，就係好似殭屍咁，行行企企無所事事。」成班無所事事嘅人，坐埋一齊會發生咩事？係呀，就係好似你班高官咁，破壞其他人嘅生產力。直接派錢畀市民，係一件事；由政府先畀錢企業，然後要企業又咁樣又嗰樣，係另一回事。
市場經濟，就業嘅意義係要透過產品同服務創造價值。假如全部人都做官，靠剝削同破壞其他人嘅勞動成果，社會係唔會進步。你知唔知對打工仔來講，最緊要係咩呀？係一個有競爭嘅社會，老闆先會惜才，打工仔先有發圍。你係又救唔係又救，個個做生意嘅都變尋租者，呢個又係「政策原意」喇喎？
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://hk.entertainment.appledaily.com