【操盤手劄記】期油「價崩」會傳染？ - 割柑人
石油弱過藥煲，市場擔心會傳染畀天然氣。大摩大膽預言，歐洲天然氣價格可能跌破零！ 資料圖片
五．一將至，有人諗起勞動節，有人諗起Bee Gees首歌《First of May》，投資者則會諗起「Sell in May and go aw
ay」，尤其今年。OPEC+話5月起減產石油，係咪成事？疫情之下石油需求萎縮，減產係咪托到價？期油月中轉倉，油價會否再瀉？
上周兩大事件：紐約期油「價崩」、北韓金正恩疑「駕崩」，都令市場打個突。期油歷史性跌至負值，低見-40.32美元。中行（3988）原油寶以結算價-37.63美元為客戶轉倉，《財新周刊》爆料，逾6萬客共輸近百億元，令人諗起12年前雷曼迷債。官媒《人民網》睇唔過眼，刊文鬧爆中行：一、原油寶歸類理財產品，令人誤會係低風險，實際係高風險類期貨產品；二、風險管控疏忽，包括轉倉遲過同業、未按規定喺長倉蝕80%時平倉、未有重視芝商所負油價信息，指中行或應承擔一定責任。
石油弱過藥煲，市場擔心會傳染，傳畀同屬能源範疇嘅天然氣。大摩就大膽預言，歐洲天然氣價格可能跌破零！原因同樣係疫情導致需求萎縮，各國封關，用量銳減，反令庫存積壓，若生產商唔減產，價格勢必再跌，甚至跌至負數。
周一油價喺亞洲交易時段又跌，不過，各國逐步復工復市，加上美、歐央行本周議息惹嚟憧憬，美股期貨踢高，港股喺期指結算前夕亦踢起1.9%，托喺24280收市。「五窮月」在即，期結後或有新一輪跌勢。
呢啲時勢，莫講話投資期油、期氣，相關ETF、債、股都宜暫避，除非閣下好熟悉油、氣市場。中國兩會預期5月召開，預計再推政策支持5G建設，相關股份中，鐵塔（788）月初以嚟喺1.7元水平橫行整固，有向上突破趨勢，不妨留意。
割柑人
本欄逢周二刊出
操盤手札記 - 割柑人 舊文
來源 source: http://s.nextmedia.com