【金手指】大操控遇真市場 - 孫柏文
等多25日，等全球石油存倉容量滿瀉後，可以保證，油市煙花更盛況。 資料圖片
孫柏文拜讀曾淵滄博士嘅文章廿多年，確實學到唔少嘢。曾博士有嗰種大俠嘅冷靜，笑看風雲嘅不羈。真係好型。就係因為咁，呢幾日睇博士講三星石油ETF（3175）時，真係令我有少少錯
愕。因為一向斬釘截鐵、見抵買嘅嘢會聲嘶力竭叫大家出擊嘅博士，都一日話：「特朗普肯定有能力逼沙地阿拉伯大幅度減產」，即ETF賣價已大折一半嘅3175抵買。即應大舉出擊啦！
不過，之後嗰日就話石油期貨太多外邊人（非生產者及用家）參與「全是大大小小的賭徒，也包括小注怡情炒ETF的我」所以先出現貼錢送油嘅怪現象。小注怡情？嚇？咁應該點呢？
武肺前，全球每日生產一億桶石油，用量亦差不多。依家用量跌咗最少兩成，每日凸兩千萬桶。全球有嘅存倉容量大約12億桶，直至上周已存7億桶。小學題：淨番嗰5億桶容量，以每日凸兩千萬桶產量，要幾多日存滿呢？等多25日，等全球滿瀉後，我呢個前石油分析員可以保證，油市煙花更盛況。即就算博士啱曬，沙地減產至零，次次到交收日都仲會貼錢送油。呢啲，就係冇得印銀紙去托嘅真市場。
咁點解唔減產？歷年來聯儲局為首嘅央行們，人為地將利率推至錢唔使息嘅境地，油產商冇錢還，咪借新錢冚舊債。因為個個都話，到9月冇理由仲負數。真係要多謝央行們嘅大操控囉。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com