【亮說亮話】新樓盤料陸續開售 - 湯文亮
相信在限聚令解除之後，新樓盤會陸續開盤。 資料圖片
雖然大家不時見到有一些劈價成交消息，但上星期五中原指數竟然破了近8個星期高位。有老友質疑是否物業代理放假消息，或者指數造假。其實，兩樣都沒有造假，不過，個別低價成交消息是小數據，中原指數是大
數據，大小數據不脗合是很正常的事，毋須大驚小怪，如果做分析，一定要用大數據，小數據可能發水或者縮水。
老友話我較早前叫地產商唔好開新樓盤，最近真係冇新樓盤開售，究竟要等幾耐才可以開新樓盤？近日，有議員在立法會叫政府撤辣，令到已有物業的業主可以多買一兩個住宅單位，但我相信政府在一時三刻都唔會撤。如果地產商等政府撤辣才開盤，我諗等到明年都未必可以。其實，從中原指數來看，地產商應該開售新樓盤。
在新冠疫情最激烈的時候，中原指數不跌反升，代表市場有不少願意付市價買樓的購買力，即使有低價成交，都不能夠阻止指數上升。與此同時，新樓貨尾單位銷售亦不俗，代表部份買家已經等唔切要入市，地產商如果仲唔開盤，有可能會錯失良機。我相信在限聚令解除之後，新樓盤會陸續開盤，行船爭解纜，新樓究竟誰賣先？
湯文亮
mailto:jacinto.tong@gmail.com
本欄逢周二刊出
亮說亮話 - 湯文亮 舊文
來源 source: http://s.nextmedia.com