【笑到最後】一注獨贏好過收息 - 高明
蘋果股價又創新高，相信蘋果地位暫時仍未受挑戰。 資料圖片
2017年嘅下半年，高明喺網台節目度反覆強調：與其追瑞聲（2018）、舜宇（2382），不如買蘋果。蘋果股價又創新高，其實買股簡單啲唔好懶醒，會行少冤枉路。撇開講個股，世界大局已變，市場獎勵
冇乜息收嘅股，懲罰派息嘅股，呢個係未來十年嘅大勢。
財務自由等於收成期：好多年前做咗一個決定，資產嘅回報能力一路保持甚至增長，就可以個個月有錢收，本地亦都因此出現一大批滙控（005）收息黨。穩定收息嘅原理來自局勢不變，過去嘅老本一路維持，直至永遠。但格局轉變之後，好難繼續收成。
咁點解𠵱家財務自由好難達到呢？第一個原因係，如果𠵱家先建倉，財務自由嘅成本非常之高。10年美債現時約半厘息，以呢一個水平去做指標，任何穩陣有息收嘅資產，統統都會俾人搶到貴一貴，即係話你要用好高嘅成本先至可以建立到一個達致財務自由嘅組合。
第二，如果有一隻資產可以派高息，你就要諗：優質資產點解要派高息畀你？如果佢高息又穩定，幾時輪到你買？其實你孭咗風險溢價，滙控又係其中一個例子。
當然，有好多人喺低位嘅時候買咗個個月有息收嘅資產，例如香港樓，又例如公用股，只要佢哋嘅建倉成本夠低，數字上回報仍然係高。
局勢轉變，究竟呢啲資產收成期可唔可以維持呢？收成期嘅缺點，就係局勢轉變，中美之間二選一，先有滙控，最近有抖音，唔會再有以前左右逢源嘅優勢。市場由二變一，一層推一層，各階層收入一定打折扣。
收成期將成最大輸家。市場二選一，點樣揀股？心中覺得邊個必成最大贏家，就買落去。即使蘋果升到呢啲位，高明仍然認為蘋果暫時仍未受挑戰。呢篇稿係用iPhone打，而至少一半人係用iPhone睇呢篇稿。
高明
http://fb.com/bigricetea
笑到最後 - 高明 舊文
來源 source: http://s.nextmedia.com