金融High Tea 2013年1月16日
金融High Tea——大戶沽貨 愈沽愈高
2013年1月16日
■港交所行政總裁李小加話，剛完成收購倫敦金屬交易所，短期商品發展未必有效果，料會在年底公佈更清晰的進展。梁文輝攝
香港去年股市唔得，靠成交和上市食飯的港交所(388)首相其衝，佢昨日公佈去年港股數字，以新股上市計，主板及創業板市場集資總額按年下跌38%至3042億元，當中新上市集資額大跌65%至898億元。雖然港股總市值大咗，但成交冷清，去年底港股市值為21.95萬億元，增長25%，日均成交金額按年卻減少23%，得538.5億元。港交所去年中期業績得22億倒退14%，斷估下半年業績都唔好得幾多。
港交所舊年生意唔好兼要出錢買倫敦金融交易所，股價跌到殘，三次跌近100元邊但係都跌唔穿，在去年9月第三次試底後，隨着美國推QE3(第三輪量化寬鬆)市勢好轉，港交所都炒番上來，昨日收148.9元，升1.4%，從低位反彈四成幾。
A股上市大塞車
港交所公佈三年戰略計劃，主要吸納內地企業到港上市為增長點，呢條水仲有排食。事關內地新股上市大塞車，由於新股供應過多被認為是A股市場低迷的元兇，阿爺審批有咁嚴得咁嚴，而家話最快要到三月先可以重啟新上市，目前內地有882間公司正在排隊申請上市，條龍好長，隊尾仲不斷有公司加入，但內地股市每年平均只批准約200至300隻新股上市，你話塞車塞得幾緊要，只要港股市場活躍番，都有唔少等唔切的公司會選擇來港上市。問題係要市道好，因為市一靜，有公司想上都上唔到。
港交所行政總裁李小加話，剛完成收購倫敦金屬交易所，短期商品發展未必有效果，料會在年底公佈更清晰的進展。聽佢咁講，唔可以預計金交所對港交所業績有太快太大的貢獻，食粥食飯都仲係睇大市成交同新公司上市多唔多。
港交所現價市盈率有31.5倍，若進一步升得太癲，公司盈利今年都未必有大增長時，小心佢再升一浸會升過籠。
近日部份企業發盈警，加上唔少二、三線股升咗好多，都係時候要調整一下。全靠內地托市招數頻出，中資股表現硬淨，力撐大市，恒指昨日早段衝高回落。
中午最多跌超過100點，午後A股發力，恒指收市只係小跌31點至23381點。受內地A股繼續炒上帶動，國企指數收市收復全日失地，平手離場，企穩12000點上方收方市，大市成交750億元，與上日差唔多。
喺呢啲又話股市回暖、又話港股直通車會開的時候，交易所股和證券股都好好炒，但亦有大戶開始沽貨套現，惠理集團在上周二減持海通證券(6837)股份，每股平均價12.786元，減持283萬股，好倉數量由5.09%減至4.9%，由於跌到5%以下，再減持唔使公佈。海通昨收13.48元升1.1%，現價比惠理減持價升咗5%。
惠理分段沽海通
惠理一直低吸海通股份，去年9月仲在9.023元時增持，到去年12底開始減貨，一路沽，隻股一路升。惠理就示範俾你睇乜嘢叫「大戶沽貨，愈沽愈高」，佢地貨多難一手清倉，所以沽貨都會分段慢慢沽，只有順住個市升時才易沽到貨，你可能覺得佢沽平咗，但佢攞個平均價無所謂，而且佢地會揀貴股沽，海通現價等如2011年歷史市盈率32倍，而去年上半年盈利還倒退，全年都唔見得精采，市盈率唔會跌，而今年生意好啲都未必會大爆發賺多好多，所以股價升得多時沽吓佢，分段獲利都唔拘。
陸羽仁
上一頁 下一頁
金融High Tea 舊文