金融High Tea 2013年3月8日
金融High Tea——食水尾
2013年3月8日
美國樓市及經濟持續回暖，美股杜指連續兩日創新高，但港股繼續近日弱弱哋嘅走勢，全日反覆偏軟，收市微跌6點，力守十天線(22725)，撇除美高梅中國(2282)股東配售4.3億元股份上板，大市實際成交只有635.7億元。
華爾街股市今個星期氣勢如虹，力創新高，內地同樣出現跌後反彈，但無論美市向好抑或內地向好，港股升幅總係跟唔足，只能打折攀升，原因相信是資金看好美股多過看好港股，資金流入外圍偏多，香港出現跟升但跟唔足的現象。
美股不宜早唱淡
雖然港股跟唔足，但股民亦不宜睇得太淡或者想走去沽空，主要係因為美股而家正進入無阻力區域，未來升勢好難度量，表面睇仲有不少人覺得美股可以再去，就算有短期回落，大幅回落機會不大。美股係全球股市的龍頭，龍頭造好帶動向上，香港相對弱勢，只能食吓水尾，但因為全球氣候係資金流入股市，就算香港係水尾市，都不宜隨便走去做淡友也。
既然香港股民只能食水尾，揀股技巧就變得重要。中國證監會公佈，為進一步擴大資本市場開放，支持香港國際金融中心地位，促進香港離岸人民幣市場發展，中國證監會與人民銀行、外匯局等有關部門決定修改RQFII相關法規，擴大RQFII試點。
香港監管機構大表歡迎，滙豐及創興銀行(1111)明言希望成為首批試點機構，睇吓又會否帶動相關板塊炒一轉。
資金現時都係跟紅頂白，買入熱炒股份或強勢股，好似政府出辣招對付樓市，發展商反應各異，龍頭新地話調低今年銷售目標，另一大佬級財團長實就話賣樓數字會創紀錄，言下之意是繼續去貨。話口未完，長實名下樓盤就宣佈減價賣樓。
中環茶友話，長實一向策略係薄利多銷，要量唔要價，你睇到集團策略係不斷投地、不斷賣樓，同其他幾個主要發展商起靚樓、求靚價明顯不同，未來特區政府增加土地供應，買地機會不乏，長實密食當三番策略自然繼續，甚至可能為咗搶胡，連一番雞胡都𡁻一餐。
長實劈價旨在地王？
不過，今次長實咁高調賣樓，茶友懷疑同何文田有幅靚地今個禮拜截標有關，佢係呢個時間高調減價，不排除係想趁機執吓平地，呢招唔成功，基本上都賣咗樓，假如成功，咁仲慳番一筆地價，正式小財唔出、大財唔入。
何文田常樂街地王本來有機會問鼎百億地王。該項目位於傳統豪宅地段，故具一定吸引力，由於項目規模大，涉及資金較多，相信主要吸引大型發展商參與，預計入標數目僅數份以內。
業內人士估計，發展商一定會將政府不斷出辣招的風險計入標價內，去年業界估計地王價值超過114億元，樓面呎價約1萬元。受辣招影響，有人把估價下調至90億元。如果用90億元計，地皮面積25.9萬平方呎，地積比率約4.41倍，可建樓面面積約為114萬平方呎，樓面呎價約7880元左右，由於地皮屬市場難得的優質豪宅用地，故並不擔心會流標。
特區政府要砌低樓價，發展商都要各自應變，講到底，經過幾十年激烈競爭淘汰下來的發展商，個個都係精甩辮，識得見招拆招，所以未打低佢哋之前，無佢哋咁醒的炒家、小業主可能已紛紛倒地，總之官商鬥法，係場邊搵食的老散，就要打醒精神，唔好做咗人肉盾牌都唔知。
陸羽仁
上一頁 下一頁
金融High Tea 舊文