金融High Tea 2013年4月24日
金融High Tea——實逆市股
2013年4月24日
■高盛投資管理部董事總經理哈繼銘相信中國未來經濟會反彈，但復甦將較為緩慢。
匯豐中國4月製造業採購經理指數(PMI)下跌，拖累港股由升轉跌，跌237點，收21806點，跌幅1.1%，不過內地股市大跌2.6%，港股又唔算回得好多。
受內地製造業數據唔理想、上海銀行業3月不良貸款率有上升趨勢影響，內地A股開市即滑，之後在底部橫行到尾，上證綜指收市大跌2.6%至2184點。A股跌得咁傷，港股都好難有運行。恒指開市仍有40點進帳，之後跟足A股走勢，收市跌238點至21807點，失守22000點，國企指數跌166點至10425點。國企股跌勢全面，「六保九行」全線向下。大市成交567億元。
外資睇淡A股無運行
港股今年跑輸晒美股，同外資睇淡中國睇好美國經濟有關。美資大行高盛甚至認為買歐股好過買內地A股𠻹。高盛投資管理部策略資產配置部門主管Neeti Bhalla話，中國股市今年至今已跑輸其他新興市場股市一成，但她仍不建議投資者買A股，原因是中國經濟仍有風險，能否脫險視乎當局會否落實改革。佢認為美國基本因素改善，在能源使用方面有好大機會最終會自給自足，故令資金湧入，推高美股，她建議投資者買入美國銀行股，甚至寧取歐股，都不買A股。
高盛投資管理部董事總經理哈繼銘雖然相信，中國經過首季遜預期的經濟增長後，未來經濟會反彈，但復甦將較為緩慢，預期今年經濟增長7.5至8.5%，除受新政府的反貪腐行動影響外，更要面對出口放緩、禽流感以至樓市受壓等不明朗因素影響。
見到金人(Goldman)咁講，你先唔好駁嘴，唔好理佢睇淡中國啱唔啱，佢反映咗美國投資界的主流意見，所以暫時來講內地A股以至港股都無運行。
港股繼續係弱市，中環茶友話，呢啲市無得炒大市，想短炒唯有吼下逆市股市有無好嘢，昨日只得六隻藍籌升，包括九倉(004)、聯想(992)、金沙(1928)、華創(291)、港鐵(066)和新世界(017)，雖然升幅有限，但都吸引眼球。聯想炒大跌後反彈，港鐵係半隻避險公用股，可以放埋一邊，其餘四隻，九倉和金沙走勢較強，九倉轉攻內地商場好掂，金沙有大行推介，佢哋仍然在近高位，反而風險較高。相對地華創和新世界都見過吓低位，最近走勢回勇，睇圖好似早前尋到個小底，可以等佢哋回吐時低吸，例如新世界回到13元(昨收13.36)、華創回到24元(昨收25.55元)吸納，以一成為止蝕，博升一成就走，由於輸一成都要跌穿早前低位，都有一定值博率。
低撈中國海外
我反而鍾意昨日跌2.5%的中國海外(688)，佢昨日跌咁多只是因為早前反彈得多，昨收22.9元，若等佢回深啲到22元時吸(保守派可以等21元)，一成打靶要見19.8元，佢近期低位是20.4元，即係買咗唔穿低位唔使打靶，亦係博升一成到24.2元，都未使升穿前日高位24.4元，較易到站。
我喜歡中海外因為聽內地發展商講，佢地今年1至3月十分好生意，4月俾國五條打一打，上半月銷售差，下半月又有點好轉，皆因除北京外都無乜地方想落實國五條，所以5、6月銷售可能無想像咁差，所以我認為撈一撈內房可以走一轉。
陸羽仁
上一頁 下一頁
金融High Tea 舊文