金融High Tea 2013年5月29日
金融High Tea——谷大抽水
2013年5月29日
今個月港股走勢玩殘不少散戶，你估升時佢就跌，你估跌時佢就升，恒指低開高走，早段平平穩穩，午後發力爆上，昨日升市，主要由中資金融股帶動。內銀股重農行(3618)逆市跌1.5%，其餘全線向上，中資保險股亦全線造好。
中國太平(966)以溢價24.5%、每股15.39元收購母企旗下包括太平人壽及財險權益。大行維持看好。野村指有助提高太平融資靈活性，重申「買入」及目標價睇18元。中國太平復牌大裂口高開10%後，收市進一步升至14.2元，勁升15%。
喺中資股回勇下，恒指收報22924點，大升238點，國企指數跑贏恒指，漲167點至10921點，惟成交未見配合，只有512億元。
新股繼續熱鬧
市況好轉，不排除同大戶需要有關。繼銀河證券(6881)及中石化煉化(2386)月中集資逾220億元，另外兩隻巨型國企新股亦會陸續登場，據聞光大銀行正物色基礎投資者，或會於7月才出台，中國生物技術集團將於下半年集資。由現在至七月期間，新股市場仍然熱鬧非常，至少有13間公司搶閘，集資最多342億元。
投行人士指出，目前新股氣氛明顯好過去年，「去年呢個時候，連約客開會見面都辛苦。」不過，投資界對新股要求仍高，企業如果比較特殊或具有超越同業技術，先有機會用好價集資，否則只有低價吸客。
13隻新股當中，集資最多係合和實業(054)分拆出來的合和地產(集資62億元)及濠賭股勵駿(集資46.8億元)。預計最快會上市是和諧汽車(3836)，本周五開始招股，招股價介乎6.08至8.88元，集資16.7億至24.5億元，市值最高逾百億。保薦人包括中金及高盛，入場費約4500元。
投資要走在風氣之先，呢樣說易行難，因為講明未成風氣，即係未有人察覺，咁即係話大部份人都做唔到啦，至於小部份人點解做得到，方法之一係大膽假設、小心求證，好似有中環茶友話，最近佢就留意隻東力投資被人炒上。
內房殼股有炒風
東力早前由招商地產收購，本來係用作商業物業旗艦，但最近母公司注入住宅項目，管理層話明想利用香港市場集資功能，協助公司達成年銷物業1000億元的目標，故此改變咗原本只做商業樓宇的諗法。?家內地對地產項目融資不斷收緊，招商想做到年銷1000億元的大戶，諗到借助香港大搞，但以東力?家規模，必需要盡力谷大，先至可以達到係香港借東風的目標。
內房商在香港插旗，有人話佢哋係想抽水唔係想派水喎！茶友話，呢個講法無錯，好似招商地產呢個諗法的大型內房商有幾間，如果條路行得通，相信好快就內房公司就會一窩蜂擁來香港買殼借殼，屆時個個開動抽水機，好快內房殼股發股氾濫，就唔再值錢。
喺資本市場，永遠係小財唔出，大財唔入，大戶瘋狂抽水出現前，照計有若干機會，會搵幾隻內房殼股炒吓，整得似模似樣，派吓利是旺吓場，趁市場仲有炒熱呢個概念，股價貴得嚟未係最瘋狂，夠膽者就可以落場投機一下。不過，呢類遊戲最後多數人係賺唔到錢收場，落場博一博者最緊要知道做緊乜。
陸羽仁
上一頁 下一頁
金融High Tea 舊文