金融High Tea 2013年7月26日
金融High Tea——食胡與食蟹
2013年7月26日
■百佳賣盤呢單刁可能要搞幾個月才有消息，無咁快得，要炒就要等下一轉。
恒指昨日高位徘徊，雖然外圍較弱，日股跌1.1％，大陸跌0.6%，但港股唔係太想跌，全日反反覆覆，最終只跌67點，跌幅0.3%，牛皮市成交金額僅453.3億元。預計下周二期指結算前，港股要跌都唔多，會頂在較高位置。業績期到，內地股有好消息唔多，只能期望有驚喜，但也要小心好消息出貨。
金沙中國(1928)次季業績符預期，但股價由接近歷史高位42.85元回吐2%，成為跌幅最大藍籌股，大家唔好忘記，佢由上月25日低位33.5元升番上高位，升咗28%，短炒業績升幅咁大，獲利盤都好多。
買405有斬獲
明日發業績的友邦(01299)回吐1.7%，佢升到新高位36.35元，又係未公佈業績就炒咗先，炒業績唔睇位食胡你就笨啦。
講起食胡，昨日有美女請我到香港仔魚市場食蟹粥，呢度啲海鮮食堂將在8月初結業，美女請我去自然義不容辭(去食)。講番呢餐緣起自我建議美女在3.7元買入越秀房地產(405)，今年5月初升上4.4元高位時佢問起我點辦，我叫佢分段沽，佢一直沽到4.8元，平均執兩成幾，結果沽完無幾耐隻股就回落，如今405只是4.09元。美女食胡位咁靚，自然不計腰間錢，請我和一班朋友去食蟹粥。
有美女在前自然認叻，我就話建議你買的股票都無乜坐艇呀，點知美女話唔係唔係，有隻恒生H股ETF(2828)仲扮緊蟹。有時仔多漏咗數，真係唔記得幾時叫過美女買2828，原來係去年5月時叫佢買，佢入貨價100元，昨收99.2元，仲差少少先至上番水面。
我突然醒起，今年2月2828升到123.7元，有23.7%利潤，你做乜唔沽呢？食咗胡又賺20幾個巴仙啦？美女答謂我無叫佢沽。我心諗做美女真幸福，買股有人建議佢買，沽貨又等人建議佢沽，可惜我同咁多人講過嘢，佢唔問我根本唔記得叫過佢買2828，自然無叫佢沽啦。我個心係咁諗，但口講出來好和顏悅色，我話「我知你唔係日日睇住個市，建議你買的都是比較大比較穩陣的股份，有啲仲係指數股，呢啲股份一年有10%回報已經好好，雖然我話佢哋可以長揸，但你買完半年就升咗20幾個巴仙，即係將兩年回報提早一年畀晒你，你做乜唔食胡？佢哋唔係騰訊(700)，唔會升幾倍，有胡要食，食完胡可以食蟹，唔食胡好易扮蟹。你睇住佢升唔沽，跟住打回原形跌凸，咁就相當無癮嘛。」
百佳賣盤無咁快
我借美女的故事，話畀大家聽，橫睇掂睇，都睇唔出一個大升市，呢一兩年只是一個上落市，港股大波幅在18000點至25000點中間走，窄少少在19000點至24000點中間行，所以若然買咗大股，又有合理賺價，不妨沽番少少出街，博低位可以揸番，輸就話唔沽啫，贏錢唔怕沽啲喎。講番昨日食蟹，成枱美女，叫我畀冧巴，我就唔敢畀啦，只係話「低揸高沽」啦，我怕講完冧巴美女們一窩蜂去買，買得唔夠平，坐咗艇點算。
講起公佈業績，隻和黃(013)下周三公佈業績，有朋友問起和黃賣百佳我點睇，係唔係利好消息。我話百佳係薄利生意，有2、3%利潤率算係咁，加上香港舖租貴、人工貴，百佳營運又相當有效率，可多賺的空間有限，搞不好利潤要跌。再加上百佳租咗唔少長和系屋邨舖位，真係未必加租加到咁足，不如沽咗出街好過。而且做百佳政治上又俾人嘈，不如沽咗佢，換番件歐洲水廠搵和7、8%回報咪仲好？
若百佳賣得好價(有機會)，對和黃有刺激，問題係可能要搞幾個月才有消息，無咁快得。和黃今年上兩個高位係88及89元，昨收86.85元，我估呢幾日出業績前有機會再衝高位，不過即使升穿亦唔去得太遠，不排除借公佈中期業績好消息出貨，然後回吐，炒百佳賣盤，要等下一轉喎。
陸羽仁
上一頁 下一頁
金融High Tea 舊文