金融High Tea 2013年8月7日
金融High Tea——象腳與短裙
2013年8月7日
■渣打業績麻麻，上半年純利21.31億美元，按年跌24%。
■青蛙王子昨日跌近3%，要炒呢類股，其實唔係咁易。資料圖片
大笨象踩扁大市。恒指受匯控(005)業績不如預期拖累急跌，失守22000關口。恒指朝早一度大跌415點，至250天線(21804點)才見支持；其後跌幅收窄，收市報21923點，跌298點，未能重上10天線。
匯控公佈中期業績，稅前盈利141億美元，按年升10%，略差過市場預期的146億。雖然好多證券行都叫做「收貨」，大摩、高盛等仍維持買入評級，不過大笨象仍然被質到四腳朝天，昨日低開4.3%之後，全日在低位徘徊。尾市一度跌穿85元，收市報85.1元，勁插5%，全日成交近29億元，佔大市總成交額6%，恒指亦被拖冧。
匯控基本收入及撥備較市場預期為弱，元兇之一係墨西哥及巴西的貸款減值撥備增加，令拉丁美洲的信貸成本按年躍升76%，抵消成本控制及歐美資產質素上的改進。匯控稅前盈利與市場預期相差大約3%，昨日跌得咁甘，一則因為匯控行政總裁歐智華自己都唱到前景好衰；二則係近日市場預期匯控有好業績，令佢升得比較勁，由6月尾的77.85元起步至上周五的90.7元，升幅接近17%，昨日借勢調整5%，都好正常。
削支模式不可持續
中環茶友們講起匯控業績，有人話都唔係咁差，做乜跌咁多。我又唔係咁睇，我話佢係美國那些環球銀行削開支搞靚業績的「失敗版」，其實美國、甚至全世界家家銀行都係咁做，生意唔係真係復甦得咁好，唯有揸把刀去斬，大力節流頂番條數，佢哋個個家大業大，肥肉好多，要減肥好多位去減，只要生意唔太差，靠減肥都減出唔錯的業績。
匯控亦係咁做，但問題係象腳太肥，條裙太短，結果遮唔到隻象腳，個款有少少人失望。匯控好多生意在拉美、亞洲、中國，唔似美國啲銀行咁，主業在美國，美國在環球樣衰衰時叫做好少少，但新興國家卻差少少，匯控的短處就露晒出來。
本來美國的銀行以至巨企呢種揸刀節流模式，已經有不可持續的問題，只是大力節流買兩三年時間，希望往後生意有強勁復甦接得上，萬一接唔上就露底。匯控就是提早露底，呢期業績已證明佢單靠節流頂唔頂條數，往後盈利有無得增長都唔知，怕只怕係一個趨勢的開始。
業務更集中在新興市場的渣打(2888)業績麻麻，似乎在市場預料之中，渣打公佈上半年純利21.31億美元，按年跌24%。期內稅前盈利33.25億美元，按年下跌15.5%；撇除信譽減值及信貸調整後，稅前盈利上升4%，至40.88億美元。
兒童用品股好難炒
渣打南韓業務減值10億美元，中國和新加坡收入減少，皆影響業績。渣打話南韓係佢哋最困難的市場。渣打亦面對現實，較早前改變全年收入有雙位數增長的目標。或許渣打稅前盈利比市場預計好，昨日黃昏時股價在倫敦升了3%。
港股昨日尾段反彈，主要由內地A股由跌轉升帶動。內地傳媒近日熱炒放寬實施了30年的「一孩政策」的消息，話有關政策可能會於今年尾結束，並計劃在2015年後完全准許家庭生兩個小孩，估計將增加950萬個嬰兒。受消息刺激，內地保健及嬰兒類消費品股普遍造好，亦帶動A股上揚。在香港上市的兒童用品公司卻無乜表現，好孩子(1086)無起跌，近日升得較多的青蛙王子(1259)更跌2.8%。
放寬一孩政策係好消息，但係只是對中國長遠經濟利好，即使放得來，生到仔，都要年幾兩年之後，唔會馬上反映在公司的業績上。好多內地兒童用品公司都係在2010、2011年在內地消費股熱潮中上市，盤數好到你唔信，其中一隻博士蛙(1698)被人踢爆停牌到依家，盤數得就好快復咗牌啦，復唔到牌大家知道乜事。我就叫大家避開呢類股份，否則模正隻假嘢又停牌真係命都無，呢啲錢唔到你賺㗎啦。
陸羽仁
上一頁 下一頁
金融High Tea 舊文