陸羽仁 BLOG 2013年11月18日
就業殘局
2013/11/18 9:55:32
網誌分類: 經濟
美國在放水之下，真係股市好，經濟麻麻，製造業和就業市場都唔係咁好。
未來一任聯儲局主席耶倫，上周四在國會聽證會發表的非常「鴿派」言論，加上周五公布的經濟數據的確又係認事麻麻：11月紐約州製造業指數為2.2，較上月的1.52有改善，但遠差過市場預期的5；10月工業産出較上月下降0.1%，係今年7月以來首次環比下滑。另外，10月份美國進口商品的價格由上月增長0.2%，轉為下跌0.7%，亦差過預期的下降0.5%，意味住通脹狀況仍然唔會有任何壓力。
市場對聯儲局唔會提早退市的信心愈來愈強。包括德銀證券的唔少分析員都預測，耶倫在明年正式上任之後，聯儲局的政策仍會延續下去，起碼要到聯儲局三月中議息，才可能見到有關退市的眉目。投資者最驚嘅就係聯儲局提早退市，「退市」陰影淡化，大市就繼續其向上之旅。
杜指及標普500指數上周五再度刷新盤中及收市歷史新高，以接近最高位收市。杜指漲85點，收15962點，标普500指數升8點，收報1798點。杜指上周大漲1.3%，標普500指數漲1.6%。已經連漲六個星期。
美國幾時退市，好睇就業情況同經濟增長是否有明顯改善。不過，美國勞動市場出現一個現象，就係所謂大學生無工資的實習計劃，直接影響就業率與市場消費能力，以至拖慢了經濟復甦步伐。
美其名讓大學生畢業後較容易融入社會，可以較容易搵工作，好多大學都同企業合作，鼓勵大學生在大學期間暫停半年至一年時間，到機構實習，實習完再返大學繼續未完的課程。一般來說，實習期間，學生只收取非常少的工資，甚至沒有工資。
好多機構見到原本要付錢的崗位，現在可以源源不絕地搵到廉價以至免費的無經驗，但高學歷、又勤奮的實習工，就將一些沒有風險，唔需要太多經驗的固定的崗位改成實習工崗位，變相造成大批工作崗位因此而「消失」了，原來收正當工資的低層勞力就搵唔到工。
結果係即使經濟好轉，企業賺到錢，失業率都唔見改善，或者以正常比例改善。另外，實習工沒有工資，基本上沒有消費能力，經濟就好難有增長。
Economic Policy Institute的副主席Ross Eisenbrey表示，二、三十年前，差不多所有人進入企業的基層工作，都有工資。現時社會比以前更加富裕，平均個以人收入高了，沒有理由唔俾工資。Eisenbrey 指出以「實習」為名，唔俾工資的這種作法，其實係延後學生的儲蓄能力及退休時間，例如累積財富買屋的時間就較以前的中產階級延後了好多。
美國傳媒唔睇好就業市場有真正改善，CNBC做了個長篇報道，講一個53女子，本來在MIT做一份年薪40萬港元的行政工作，2008年被裁員之後，一路搵唔到工，想做清潔都無人請，最近申請破產。原來在美國失業本身就係一個好難再就業的理由，失業半年之內在20%、30%機會搵番工，失業時間一長，搵工機會跌到10%以下。報道話雖然失業率由高峰的10%跌到而家的7.3%，佢懷疑美國7.3%失業率，唔係週期性，係結構性，理由係工種錯配，例如有人搵行政工，其實需要程式員。
真正問題如果就業係死症，即使明年開始收水，一收失業又上番，咁點收落去呢又?
陸羽仁
回應(5) 我想回應
陸羽仁 BLOG 舊文